VOV4.Xơ Đăng - Hâi lơ 5/7, a Tíu pêi cheăng Chin phuh, pôa Phạm Minh Chính, Ngế pro xiâm hnê ngăn tơnêi têa hiăng tơpui phôn ƀă pôa Han Duck-soo, Ngế pro xiâm hnê ngăn kong têa Hàn Quốc.

A roh tơpui phôn, péa Ngế pro xiâm hnê ngăn tơnêi têa môi tuăn mâu troăng pêi ki nhên thăm mơnhông tơrŭm cheăng pơla péa tơnêi têa tung la ngiâ, pơtối tơrŭm krá tơniăn tơkŭm po châ tơƀrê mâu tơdroăng leh tơbâ 30 hơnăm mơjiâng tơrŭm tơpui kâ hơnăm 2022; pêi pro châ tơƀrê mâu troăng tơrŭm cheăng pơla péa pâ ƀă hên pâ, mơhnhôk mâu khu tê mơdró Hàn Quốc po rơdâ mơ’no liăn cheăng a Việt Nam.

Pôa Phạm Minh Chính, Ngế pro xiâm hnê ngăn tơnêi têa tơpui phôn ƀă Ngế pro xiâm hnê ngăn kong têa Hàn Quốc

Tơpui tơno ‘na tơdroăng têa kơxĭ Biển Đông, péa pâ tối ‘na troăng tơmiât tơdjuôm ‘na rak hơniâp lĕm tơniăn, tơniăn gâk kring, tơniăn lĕm, tơniăn troăng têa kơxĭ Biển Đông, pơxúa ki tơxâng dêi mâu kong têa tơtro ƀă luât lâp plâi tơnêi, tung mê ai Tơkêa Khu lâp kong têa ‘na Luât têa kơxĭ (UNCLOS) 1982.

A Sa Ly tơplôu ƀă tơbleăng