A rôh tơdah, péa Ngế pro xiâm hnê ngăn tơnêi têa hiăng môi tuăn pơtối mơdêk mâu rôh lăm pôu, trâm mâ khu râ kăn xiâm ƀă mâu khu kăn pơkuâ cheăng tung tâi tâng kơvâ cheăng Đảng, Tơnêi têa, Chin phuh ƀă Kuô̆k hô̆i; malối môi tuăn kô tơkŭm po rôh trâm mâ rêm khế pơla Ngế pro xiâm hnê ngăn pơla péa tơnêi têa vâ tơpui tơno ‘na tơrŭm cheăng pơla péa pâ ƀă mâu tơdroăng ki péa pâ rơtế vâ ‘nâi.

Péa Ngế pro xiâm hnê ngăn péa tơnêi têa tối nhên kal tơbleăng tơƀrê tơrŭm cheăng tung la ngiâ Cheăng kâ Ngiât – Cheăng kâ kơxô̆, pro tơ’lêi hlâu vâ ăm tơrŭm cheăng Việt Nam – Singapore chiâng túa pơkâ tung la tung ASEAN; mơnhên tối khât tơdroăng ki péa pâ hiăng teăm pêi klêi tơdroăng ki mơdêk tơrŭm cheăng Tơdjêp péa kong têa cheăng kâ Việt Nam – Singapore.

Pôa Phạm Minh Chính, Ngế pro xiâm hnê ngăn Chin phuh pơkâ thế Singapore pro tơ’lêi mơdêk roê xo mâu kế tơmeăm dêi Việt Nam; po rơdâ mơ’no liăn cheăng tung mâu kơvâ cheăng ki xiâm ƀă ối tung tơdroăng ki châ kơjo kum dêi Việt Nam; tŏng kum Việt Nam mơnhông mâu kơvâ cheăng ƀă kơmăi kơmok tŏng kum ăm mâu kơvâ mơjiâng bro kế tơmeăm pơchoh hmân ếo, uâ loăng, bro tuk, bro troăng klông, trếo pơkeăng, têa châu.