Klêi kơ’nâi Leh tơdah, pôa Phạm Minh Chính, Ngế pro xiâm hnê ngăn tơnêi têa hiăng tơpui ƀă pôa Lý Cường, Ngế pro xiâm hnê ngăn kong têa Sinuâ. A roh tơpui tơno, pôa Phạm Minh Chính loi tơngah roh lăm pôu pêi cheăng dêi Ngế pro xiâm hnê ngăn kong têa Sinuâ kô châ tơƀrê lĕm, păng ‘nâng, trâu hơngế ƀă tâi tâng; kum tung hơniâp lĕm, tơniăn ƀă tơrŭm cheăng, mơnhông a kơpong ƀă lâp plâi tơnêi.

‘Na tơrŭm cheăng tung la ngiâ, péa Ngế pro xiâm hnê ngăn tơnêi têa môi tuăn pêi pro châ tơƀrê hlê plĕng tơdjuôm dêi Khu râ kăn pơkuâ râ xiâm dêi péa Đảng, péa tơnêi têa; pơtối krá tơdroăng loi kal kí, rak đi đo trâm mâ khu râ kăn xiâm ƀă mâu râ; mơdêk mâu troăng trâm mâ, tơrŭm, mơdêk păng ‘nâng tung mâu kơvâ ki xiâm, thăm trâm mâ kuăn pơlê, rak tơniăn xiâm kối pơlê pơla krá tơniăn ăm tơdroăng mơnhông dêi tơrŭm cheăng Việt Nam – Sinuâ; pơtối tơrŭm krá tơniăn ƀă môi tuăn tŏng kum dêi pó tung mâu troăng pơkâ pêi, hneăng hôp tơpui tơno; tơrŭm pơkuâ tơtro lĕm troăng tơkăng kong a tơnêi.