Nôkố, Việt Nam hiăng ai vâ chê  900 rơpâu khu mơdró dế pêi cheăng, dâng 14,4 rơpâu khu pêi cheăng tơrŭm ƀă lối 5 rơtuh rơpŏng ki mơdró kâ. Mâu khu mơdró veăng ‘no hnoăng lối 60% GDP, dâng 30% tung tâi tâng kơxô̆ mơngế pêi cheăng. Pakĭng  tơdroăng pêi cheăng tê mơdró, khu mơdro đi đo mơhno hnoăng cheăng pêi dêi pơlê pơla, hên khu mơdró hiăng ƀă dế mơ-eăm pêi mâu tơdroăng kơdroh kơklêa xăm kơtiê, mơnê kơ mâu ai hnoăng tơnêi têa.

Tơbleăng a rôh trâm mâ, pôa Phạm Minh Chính hiăng pơtroh rơkong rơkâu mâu tơdroăng ki lĕm má môi dêi pôa Nguyễn Phú Trọng, Kăn xiâm pơkuê hnê ngăn Đảng troh kơ tâi tâng mâu khu mơdró kâ rơkê, mâu khu mơdró Viêt Nam.  Ngế pro xiâm hnê ngăn Chin phuh xuân tối kô pơtối rơtế ƀă khu mơdró.

Pơtối rak tơniăn cheăng kâ kân, kâi mơdât ki liăn ôh tá kơnâ yă, mơnhông cheăng kâ tơniăn vâ tơdâng tơ’mô dêi tơdroăng cheăng kâ. Pơtối mơdêk ‘no liăn cheăng tê mơdró tơdâng tơ’mô, tơ’lêi hlâu, ôh tá pơrah dêi rơpó, tơdrăng, tah tơdroăng ki pro pá, pơkâ ‘na tơdroăng tê mơdró ki ôh tá kal, mơdêk ivá tơbriât cheăng dêi tơnêi têa, mơdêk ‘mâi hơ’lêh túa pro hlá mơ-éa, mơjiâng cheăng kâ kơxô̆, Chin phuh kơxô̆ tiô túa nêó nôkố, hmâ ƀă hyôh kong prâi ƀă mâu kuăn pơlê ƀă khu mơdró.