Ngế pro xiâm hnê ngăn tơnêi têa hiăng tối tơdroăng nếo ăm mâu kuăn pơlê tơdroăng châ tơƀrê hneăng hôp má 8 ƀă tơdroăng cheăng kâ – rêh ối pơlê pơla dêi tơnêi têa pơla kố nah, tơdroăng pơhlêh nếo, bro lế lĕm tro khu râ kăn pêi cheăng khu cheăng kal kí, kơdroh ƀiên chê̆ ƀă vêh rah tơniăn tro, mơdêk ki dâi lĕm, xúa châ tơƀrê khu kăn ƀô̆, kŏng chưk, viên chưk; kơdroh mơ’no hrê đi đo ƀă veăng kum pro tơniăn lĕm troăng hơlâ liăn khế.

Tơdrêng amê, Ngế pro xiâm hnê ngăn tơnêi têa xuân tiâ tối mâu rơkong kơ-êng dêi kuăn pơlê rơhêng vâ ‘nâi, môi tiah: mâu tơdroăng ki tơdjâk troh troăng klông, ki má lối cho troăng kân ăm phêp rơxế kơtâu têi Pa Kơnhŏng - Pa Hdroh, Troăng rơxế lơtreng kơtâu têi Pa Kơnhŏng – Pa Hdroh, mâu troăng hơlâ ƀă mơngế ai hnoăng ƀă kăch măng; tơdroăng hbrâ ví têa lân, rak vế têa kơpong tơbăng kroăng Cửu Long.

Ngế pro xiâm hnê ngăn tơnêi têa mơnhên nôkố, Chin phuh ƀă mâu kong pơlê dế thăm pêi pro mâu troăng pơkâ pêi tŭm 1 rơtuh hectar tơnêi vâ pêt 1 rơtuh hectar báu, mơjiâng inâi báu phái Việt Nam ô eăng tung lâp plâi tơnêi, ai hên kơchơ tê mơdró, tŏng gum khoa hok kŏng ngê̆, xúa pơhlêh xúa kŏng ngê̆ nếo tung pêi cheăng.