VOV4.Xơ Đăng - Kơxê lơ 17/6, pôa Phạm Minh Chính, Ngế pro xiâm hnê ngăn tơnêi têa pơkuâ po rôh hôp trâm mâ dêi Khu pơkuâ ngăn Chin phuh ƀă kăn pơkuâ mâu kơ koan chêh hlá tơbeăng drêng tơbâ 97 hơnăm Hâi Hlá tơbeăng Kăch măng Việt Nam lơ 21/6. Klêi kơ’nâi hmâng mâu rơkong tơpui tối dêi mâu kăn pơkuâ mâu kơ koan chêh hlá tơbeăng, tơpui a rôh trâm mâ, pôa Phạm Minh Chính tối nhên: hlá tơbeăng cho kông tơdjêp vâ tối tơbleăng tơdroăng kal troh Kuăn pơlê ‘na tơdroăng cheăng kâ rêh ối pơlê pơla dei tơnêi têa, tối ‘na tơdroăng ki ai khât tung pơlê pơla, mâu tơdroăng ôh tá tro, châ hlo mâu rôh pêi pro kâ kơluâ, pro mơhrê liăn ngân tê kơtê, mâu troăng hơkâ ki ôh tá tro kal châ ‘mâi rơnêu.

Ta tá rôh trâm mâ

Ngế pro xiâm hnê ngăn tơnêi têa tối nhên, mâu tơdroăng ki tối tơbleăng mê ga ai pơxúa khât ƀă tơdroăng ki pơkuâ dêi Chin phuh, mê Chin phuh đi đo séa ngăn, tơmâng mâu tơdroăng ki kuăn pơlê tơpui ing mâu tíu ki chêh hlá tơbeăng vâ ai troăng pơkâ tơleăng tơtro, teăm tơdrêng. Teăng mâ Chin phuh, Ngế pro xiâm hnê ngăn tơnêi têa rơkâu, khĕn kơdeăn ƀă mơnê tơdroăng ki veăng kum dêi khu chêh hlá tơbeăng tơnêi têa, veăng kum rơtế ƀă Đảng, Tơnêi têa pêi pro châ hên tơdroăng ki kal.

A Sa Ly tơplôu ƀă tơbleăng