Tung pơla kố nah, Kơ koan teăng mâ đi đo tơmâng tŏng gum pơlê pơla mơngế Việt Nam, gum kuăn pơlê pin rêh ối pêi cheăng a kong têa ê hmiân tuăn, pêi kâ rêh ối, gum mơnhông cheăng kâ rêh ối pơlê pơla dêi Lếo ƀă veăng gum ăm pơlê xiâm, tơnêi têa, ăm tơrŭm cheăng Việt Nam - Lếo.

Xông tơpui a roh trâm mâ, pôa Phạm Minh Chính, Ngế pro xiâm hnê ngăn tơnêi têa kheăn kơdeăn mâu kơ koan teăng mâ a Lếo hiăng tơkâ hluâ hên pá puât, pêi kêi đeăng lĕm tro mâu hnoăng cheăng ki Đảng ƀă Tơnêi têa pơcháu, gum mơdêk tơrŭm cheăng nhŏng o kân kĕng, rŭm môi tuăn ki phá tơ-ê ƀă tơrŭm cheăng tâi tâng Việt Nam - Lếo.

Ngế pro xiâm hnê ngăn tơnêi têa tối nhên, tung tơrŭm cheăng Việt Nam - Lếo, tơrŭm kal kí cho ki xiâm, tơdrêng amê thế mơdêk ó rơdêi tơrŭm cheăng kâ, tơrŭm hnê hriâm, hnê mơjiâng mơngế pêi cheăng ƀă mâu kơvâ cheăng ki ê, veăng gum pro krá tơniăn, tơbêng ăm tơrŭm cheăng Việt Nam - Lếo rế hía rế mơnhông mơdêk tung rêm kơvâ cheăng, djâ ki pơxúa păng ‘nâng ăm kuăn pơlê péa tơnêi têa.