VOV4.Xơ Đăng - Tung rôh po Hneăng hôp khu kăn xiâm ki kal ASEAN – Mih a pơlê kong xiâm Washington DC, kong têa Mih, mê kơmăng lơ 12/5, pôa Phạm Minh Chính, Ngế pro xiâm hnê ngăn Chin phuh hiăng ai rôh trâm pôa Joe Biden, kăn xiâm pơkuâ kong têa Mih a Hngêi Chin phuh. A rôh trâm mâ, pôa Phạm Minh Chính prếi pôa Joe Biden hiăng tơpui tơno ‘na tơrŭm cheăng pơla péa pâ Việt Nam – Mih ƀă mâu tơdroăng tung kơpong, ƀă a kong têa ê.

Pôa Phạm Minh Chính, Ngế pro xiâm hnê ngăn tơnêi têa prếi pôa Joe Biden, Kăn xiâm pơkuâ kong têa Mih

Pôa Phạm Minh Chính mơnhên tối khât tơrŭm cheăng Việt Nam – Mih cho môi tơrŭm cheăng ki tơviah. Péa pâ hiăng tơkâ luâ mâu tơdroăng ki châi heăng tung rôh tơplâ nah, rơtế ƀă dêi rơpó tơrŭm, mơdêk tơrŭm cheăng tung tai tâng mơnhông rế hía rế tơdrăng khât, tơƀrê tung mâu tơdroăng cheăng. Việt Nam rơhêng vâ Mih pơtối tŏng kum ƀă tơrŭm cheăng ƀă Việt Nam tung mâu kơvâ cheăng ki Mih ai hlâu, châ rơdêi ƀă Việt Nam dế ai hlâu ƀă tơdroăng ki rơhêng vâ môi tiah hbrâ mơdât pơreăng, hơ’lêh kơxô̆, hên tơdroăng ki tŏng kum, hbrâ ví ƀă kong prâi pro hơ’lêh, hnê ăm mâu ngế pêi cheăng.

Katarina Nga tơplôu ƀă tơbleăng