Kơxo lơ 16/9, pôa Phạm Minh Chính, Ngế pro xiâm hnê ngăn tơnêi têa pơkuâ djâ khu râ kăn teăng mâ Việt Nam lăm veăng a Kơchơ mơđah tơbleăng tơmeăm khoăng Sinuâ – ASEAN (CAEXPO)   ƀă Hneăng hôp khu râ kăn xiâm Tê mơdró – Mơ’no liăn cheăng kong têa Sinuâ – ASEAN (CABIS) roh má 20 a pơlê kong kân Nam Ninh, Quảng Tây, Sinuâ sap ing hâi lơ 16 troh hâi lơ 17 khế 9 hơnăm 2023 tiô rơkong krếo thế dêi Chin phuh kong têa Sinuâ.

Kố cho tơdroăng ki kal ối tung tơdroăng leh tơbâ 20 hơnăm mơjiâng tơrŭm cheăng ton xŏn pơla Sinuâ ƀă ASEAN, leh tơbâ 20 hơnăm CAEXPO ƀă CABIS. Kơchơ mơđah tơbleăng kế tơmeăm khoăng ai 04 tơdroăng ki xiâm ƀă 1 roh hôp ki kŭn nếo. Môi tiah mâu hneăng kơchơ mơđah tơbleăng kế tơmeăm khoăng hdrối nah, hơnăm kố, khu tê mơdró dêi Việt Nam veăng kơchơ mơđah tơbleăng kế tơmeăm khoăng kân má môi ASEAN (ƀă 250 kơbong chôu ‘măn tơmeăm, ƀăng deăng 5.000 met karê.