Kơxê lơ 24/8, pôa Phạm Minh Chinhh, Ngế pro xiâm hnê ngăn Chin phuh pơkuâ po rôh hôp ‘na mơjiâng luât khế 8/2023 vâ tơpui ‘na mâu tơdroăng tơkêa luât: Luât Pơlê kong xiâm (ki ‘mâi hơ’lêh); Luât Rak tơniăn a troăng prôk; Luât Troăng prôk; Luât pêi cheăng ƀă kơmăi kơmok kring vế pơlê pơla ƀă mơhnhôk pêi hnoăng cheăng ƀă kơmăi kơmok.

A rôh hôp, Chin phuh hiăng tơmâng kơ koan pơkuâ tối tơbleăng ‘nâng ‘nâi mâu kơxop hlá mơ-éa luât; tối tơbleăng, tơmâng xo mâu rơkong tơpui tối mơjiâng mâu tơdroăng tơkêa luât; chêh xo mâu rơkong tơpui tối dêi mâu khu xiâm, kơvâ cheăng;  séa ngăn ‘na túa pơkâ, hlá mơ-éa chêh pơkâ; mâu tơdroăng pơkâ thế, tơdroăng pơkâ mơjiâng Luât; tơdroăng ki tơdâng tơ’mô, môi tuăn ƀă mâu túa pơkâ luât ki ai tơdjâk troh; tí tăng tơdroăng ki hlê plĕng a kong têa; tơdrêng amê, hlối tơpui tối leăng trâu hơngế mâu tơdroăng ki ối ai hên rơkong tơpui tối pơra phá dêi rơpó a mâu kơxop hlá mơ-éa luât.

Rơtế ƀă mâu rơkong tơpui tối tơrêm kơxop hlá mơ-éa luât, mơgêi rôh hôp, pôa Phạm Minh Chính, Ngế pro xiâm hnê ngăn Chin phuh pơkâ thế mâu khu xiâm, kơvâ cheăng, tơbleăng tơdroăng séa ngăn, mơgêi, tơdroăng pơtroh mâu tơdroăng tơkêa, vâ pơkâ thế mơjiâng luât athế pêi pro nhên mâu tơdroăng pơtó, rak vế môi tiah nôkố; pêi pro nhên mâu pơkâ kal ‘mâi rơnêu, ‘mot tơ’nôm, pơkâ nếo. Ngế pro xiâm hnê ngăn tơnêi têa pơchân, tung la ngiâ, hnoăng cheăng mơjiâng luât troăng hơlâ kô hngăm tâ.

Chin phuh, mâu ngế cheăng tung Chin phuh athế khŏm mơ-eăm pêi pro ƀlêi chiâng khât ‘na mơjiâng, pro klêi troăng hơlâ, tŏng kum khât mâu tơdroăng pơkâ krá, tơdroăng mơdât, pro tơ’lêi hlâu má môi ăm kuăn pơlê, khu mơdró kâ; rak tơniăn tơ’lêi mâu kơxô̆ liăn ăm mơnhông mơdêk cheăng kâ rĕng ƀă krá ton, veăng kum pêi pro ƀlêi chiâng xua Đảng Tơnêi pin pơkâ.