Kơxo lơ 9/10, Rôh hôp Khu râ kăn xiâm ASEAN rôh má 44, 45 ƀă mâu Rôh hôp ki tơdjâk troh hiăng po kân krip a Tíu xiâm po Rôh hôp Tơnêi têa dêi Lếo, ƀă tơdroăng ki ai mâ dêi mâu kăn pơkuâ mâu kong têa ASEAN, Timor-Leste rơtế ƀă hên teăng mâ khu tơrŭm, mâu kong têa a kong têa ê ƀă tung kơpong.

Pôa Phạm Minh Chính, Ngế pro xiâm hnê ngăn tơnêi têa pơkuâ djâ khu kăn xiâm Việt Nam veăng hôp a rôh hôp kố. Tơpui a rôh pơxiâm po hôp, pôa Thongloun Sisoulith, Kăn xiâm pơkuâ hnê ngăn Đảng, Kăn xiâm hnê ngăn kong têa Lếo tối nhên, tung la ngiâ, ASEAN kô tơkŭm tâi tâng mâu kong têa Đông Nam Á ƀă tơdroăng ki Timor-Leste chiâng kong têa ki tơrŭm cheăng ai tŭm dêi ASEAN, tối nhên ki ai hên ƀă ki ai hlâu dêi kơpong, tơdrêng amê hlối po ăm rôh tơrŭm cheăng ki nếo ƀă mâu kong têa tơrŭm cheăng.

Ƀă inâi “ASEAN: Mơdêk tơdjêp ƀă Mơ-eăm”, mâu tơdroăng kơjo, tơmiât rơkê tung hơnăm pro kăn xiâm hnê ngăn dêi Lếo veăng gum pêi pro mâu tơdroăng pơkâ tơdjuôm mơjiâng môi Pơlê pơla ASEAN tơdjêp tâ nếo ƀă mơeăm tâ. Klêi kơ’nâi po leh pơxiâm, pôa Phạm Minh Chính, Ngế pro xiâm hnê ngăn Chin phuh rơtế ƀă kăn pơkuâ mâu kong têa ASEAN ƀă Timor-Leste veăng hôp a rôh hôp tâi tâng Rôh hôp Khu râ kăn xiâm ASEAN, tơpui ‘na mâu tơdroăng ki kal tơrŭm cheăng tung ASEAN ƀă pơla ASEAN ƀă mâu kong têa tơrŭm cheăng.