Drêng troh măng tĭng leh mâu Kăn xiâm Hneăng 78 Hneăng hôp Hô̆i đong Khu lâp kong têa ƀă tơdroăng cheăng pơla péa pâ a Mih, kơxo hâi lơ 18/9 (Tiô chôu tơnêi têa), a pơlê kong kân San Francisco, kong pơlê kân California, pôa Phạm Minh Chính, Ngế pro xiâm hnê ngăn tơnêi têa veăng “Hôp ƀă khu mơdró Việt Nam - Mih tơrŭm cheăng tung tơdroăng ‘na kŏng ngĕ, hơ’lêh tơdroăng hriăn plĕng ki nếo” xua Khu xiâm ngăn tơdroăng Pơkâ ƀă ‘no liăn cheăng hiăng tơrŭm ƀă Kăn xiâm teăng mâ Việt Nam a San Francisco ƀă Hô̆i đong Mih - ASEAN  vâ tơkŭm. 

A hneăng hôp, kăn teăng mâ mâu Khu mơdró péa tơnêi têa hiăng tơpui tơno, tơdrăng ƀă ki khât ‘na rôh tơrŭm ‘no liăn cheăng, tung mê tơkŭm pêi a tơdroăng kŏng ngĕ, hơ’lêh tơdroăng hriăn plĕng ki nếo; púi vâ veăng a tung tơdroăng pơ’lêh kơxô̆ dêi Việt Nam. Ƀă tơdroăng tơmiât “Mơngế mo lĕm kô kum mâu ki pá kâi hro; mơngế hơnăm ối nếo kum mâu ngế hiăng krâ, mâu kro mơdrŏng kum mâu ki pê lo liăn iâ” ƀă troăng rơhlâ “pơtê lôi ‘nôi tơdroăng ton nah, pêi mâu tơdroăng tung la ngiâ, hơlêm dêi rơpó châi heăng xua tơdroăng tơplâ”, Ngế pro xiâm hnê ngăn Chin phuh púi vâ kuăn pơlê, khu mơdró Mih troh ƀă Việt Nam vâ hlo tơdroăng ki hơ’lêh nếo dêi Việt Nam; mơhno Chin phuh Việt Nam vâ lôu péa tơdah tâi tâng tá khu mơdró troh ‘no liăn cheăng tê mơdró tro tiô luât, tơniăn pơxúa xua  ki rơdêi, kro mơdrŏng dêi tơrêm tơnêi têa, phâi tơtô, hơniâp ro dêi kuăn pơlê.