Tơbleăng a hneăng hôp, pôa Phạm Minh Chinh, Ngế pro xiâm hnê ngăn Chin phuh pơkâ thế ASEAN ƀă Ấn Độ pơtối kum tơdjuôm ‘na túa lĕm tro, rêh ối pơlê pơla, kuăn mơngế, mơnhông tơrŭm péa pâ rế rơdêi, tung tŭm tơdroăng. Ngế pro xiâm hnê ngăn tơnêi têa tối, ing tơdroăng ki tơdjuôm krá, rơtế tơrŭm ton hơnăm, ASEAN púi vâ rơtế ƀă Ấn Độ, kong têa achê hmâ, ngế pú ki tơdrăng ƀă tơrŭm cheăng loi nhoăm dêi rơpó tung tŭm tơdroăng, veăng ‘no hnoăng pro hơniâp lĕm, tơniăn, tơrŭm mơnhông kro mơdrŏng, krá ton ăm tơrêm pâ, tung kơpong ƀă lâp plâi tơnêi.

Tối nhên tơrŭm cheăng tung tŭm tơdroăng pơla ASEAN- Ấn Độ, Ngế pro xiâm hnê ngăn tơnêi têa pơkâ thế péa pâ rơtế mơnhông tơpui tơno tơrŭm cheăng mơjiâng tuăn loi dêi rơpó, tơleăng mơnhên tơbriât dêi rơpó ƀă tơdroăng tơpui pro hơniâp, hbrâ ví mâu pơloăng mơnúa tơdjuôm, mơdêk luât lâp plâi tơnêi. Ngế pro xiâm hnê ngăn tơnêi têa môi tuăn ƀă mâu tơdroăng hriăn plĕng dêi Ấn Độ môi tiah Hriăn plĕng Khu tơrŭm  pro on tơhrik kơtâu ing mâ hâi, Khu tơrŭm pro têa châu sinh học, Khu tơrŭm mơjiâng tơmeăm khoăng hngêi trăng ki kâi trâng ƀă kong prâi ki hmâ pro ôh tá tơniăn, xuân môi tiah pơkâ Ấn Độ veăng kum mơnhông pro pơkeăng.