A hneăng hôp, mâu khu mơdró hiăng tơmâng mâu kăn xiâm, kơvâ cheăng tơbleăng ‘na tơmeăm khoăng tơrŭm cheăng pơla péa tơnêi têa, luât tŏng kum tơ’’mot  ‘no liăn cheăng dêi rêm pâ. Mâu khu mơdró dêi Saudi Arabia khĕn kơdeăn tơdroăng ‘no liăn cheăng, tê mơdró rế châ ‘mâi hơ’lêh a Việt Nam; hlối tăng rôh ki tơ’lêi vâ tơrŭm ‘no liăn cheăng, tơdjêp tê mơdró, tối mâu tơdroăng pâ thế ƀă Chin phuh, mâu kơvâ cheăng péa tơnêi têa ƀă tối mâu tơdroăng tơrŭm cheăng nhên ƀă púi vâ pro xiâm ki pơxúa ƀă mơnhông mơdêk nếo, mơnhông tơrŭm cheăng kâ péa tơnêi têa ‘na tơmeăm ƀă ki trâu rơdâ tung la ngiâ.

Tơbleăng a rôh hôp,  pôa Phạm Minh Chính, Ngế pro xiâm hnê ngăn tơnêi têa tối nhên, Việt Nam kô pro tơ’lêi lâu ăm mâu khu ‘no liăn cheăng pêi tơƀrê, tơniăn, krá ton a Việt Nam. Ngế pro xiâm hnê ngăn tơnêi têa púi vâ Việt Nam ƀă Saudi Arabia kô tơrŭm cheăng krá tâ, rơtế chiâng tíu ki tơdjêp vâ khu mơdró péa pâ ôh tá xê to tơrŭm veăng tê mơdró kế tơmeăm ăm dêi rơpó mê ối po rơdâ tá kơpong ki ai tơmeăm khoăng, kân rơdâ ASEAN ƀă GCC.

Xuân tung hâi lơ 19/10, pôa Phạm Minh Chính, Ngế pro xiâm hnê ngăn Chin phuh hiăng tơdah Ngế xiâm pơkuâ cheăng kâ ƀă pơkâ túa cheăng Saudia Arabia ƀă Ngế xiâm pơkuâ mơngế pêi cheăng ƀă mơnhông mơdêk pơlê pơla Saudia Arabia. A mâu roh tơdah, pôa Phạm Minh Chính, Ngế pro xiâm hnê ngăn Chin phuh rơkâu mâu tơdroăng châ tơƀrê kân dêi Saudia Arabia tung tơdroăng ai hên ƀă mơnhông mâu kơvâ cheăng kâ ôh tá xê hrik chuâ têa châu têa kơxăng, mơdêk xúa khoa hok kŏng ngê̆, pơ’lêh nếo troăng tơmiât pêi rơkê, kơjo mơnhông mơdêk krúa lĕm kong prâi, krá tơniăn, tơmiât troh pêi pro mâu pơkâ tung troăng pêi ton xŏn ‘’Tơmiât pêi troh hơnăm 2030’’.

Mơnhên tơrŭm cheăng Việt Nam - Saudia Arabia dế mơnhông lĕm ƀă ối hên tơmeăm vâ mơdêk tơrŭm, Ngế pro xiâm hnê ngăn Chin phuh pơkâ thế péa tơdroăng cheăng kâ thăm tơdjêp, tơrŭm tơkŭm po mâu tơdroăng mơhnhôk tê mơdró, mơ’no liăn cheăng, tung mê, kơjo mâu kơvâ môi tiah on tơhrik, liăn ngân hngêi arak liăn, mơdêk tơrŭm cheăng tung kơvâ cheăng nếo môi tiah tơrŭm pêt mơjiâng tơmeăm, uâ mơdiê tơmeăm Halal, pơ’lêh pêi cheăng xúa kŏng ngê̆...