Kơxo lơ 10/1, pôa Phạm Minh Chính, Ngế pro xiâm hnê ngăn Chin phuh hiăng veăng hôp tối mơgêi tơdroăng cheăng dêi kơvâ tơpui kâ hơnăm 2022, tối tơbleăng troăng rơhlâ pêi hơnăm 2023. Hơnăm 2022 tơdroăng cheăng tơpui kâ hiăng châ mơdêk rơdêi tung tŭm tơdroăng cheăng tung tơnêi têa ki kân ƀă tâi tâng mâu khu tơrŭm cheăng, mơhno luâ vâ chê 70 tơdroăng cheăng tơpui kâ dêi mâu kăn xiâm Đảng, Tơnêi têa, tung mê ai 14 rôh lăm pôu dêi pin troh a 17 to kong têa; veăng 5 rôh hôp kân lâp plâi tơnêi tơpui hên tơdroăng; hrĭng rôh trâm mâ pơla péa pâ ƀă mâu kăn xiâm dêi mâu kong têa tung lâp plâi tơnêi; tơdah 19 khu kăn xiâm dêi mâu kong têa lăm pôu Việt Nam.

Teăng mâ kăn xiâm Đảng, Tơnêi têa, pôa Phạm Minh Chính tơmâng xo, khĕn kơdeăn khât mâu tơdroăng ki mơ-eăm kân ƀă mâu tơdroăng pêi pro ki kal tối kơpêng mê dêi kơvâ tơpui kâ tối tơdjuôm ƀă khu xiâm tơpui kâ tối krê, veăng ‘no hnoăng ki kal tung tơdroăng cheăng pêi tơdjuôm dêi lâp tơnêi têa hơnăm 2022; mơhno ki tơƀrê tung tơbleăng troăng rơhlâ tơpui kâ “tơdroăng ‘nâi tơrŭm, tơdrăng loi nhoăm, oh tá pơrah, nhoăm khât, pêi pơxúa tơƀrê, rơtế mơnhông mơdêk’’.