Ƀă  mâu tơdroăng hơ ui pâ má môi, veăng kum, ‘nâi hơ ui kơ mâu ki pá, Ngế pro xiâm hnê ngăn tơnêi têa  pơtroh rơkong mơhnhôk hơlêm ăm mâu ƀok thái pơkeăng, mâu ngế cheăng a  Tíu xiâm ‘măn rak mơheăm -  ‘Mot mơheăm dêi tơnêi têa, mâu nôu pâ ƀă malối cho tâi tâng vâi o vâi muăn ƀă rơkong tơpui ki lĕm hlối hơlêm rơkâu tơdroăng ki lĕm má môi drêng troh Têt Trung thu hơnăm 2023.

Rơkâu vâi muăn kuăn cháu đi đo mo lĕm, hơnriâp ro; púi vâ mâu ƀok thái pơkeăng, mâu ngế cheăng pơlẩ rak ngăn vâi o vâi muăn thế đi đo loi khât, ƀă mơ-eăm pêi cheăng pơlât mâu ki châi tamo, mơ-eăm tơkâ luâ xơpá, pêi pro tơdroăng ki lĕm tung la ngiâ. Mâu ƀok thái pơkeăng mâu ngế cheăng pơlât ngăn, mâu  rơpŏng hngêi ƀă pơlê pơla kô đi đo ối ƀăng, hơ ui pâ, veăng kum  hơlêm, kum pơlât vâi o vâi muăn. Ngế pro xiâm hnê ngăn tơnêi têa púi vâ mâu vâi o vâi muăn ƀă nôu pâ vâi o pôi tá tô tuăn, thế loi a hnoăng cheăng pơlât  krâu a kố.