Tơpui a rôh leh, pôa Phạm Minh Chính, Ngế pro xiâm hnê ngăn tơnêi têa tối nhên, kố cho tơdroăng ki kal, pơxúa dêi kơvâ têa châu têa kơxăng châ tơmâng ngăn khât dêi rêm râ, mâu kơvâ cheăng, kong pơlê ƀă kuăn pơlê tíu ki ai tơdroăng tơkêa prôk tơkâ luâ. Ngế pro xiâm hnê ngăn tơnêi têa tối nhên, tung la ngiâ, túa pơkâ mơjiâng tâi tâng on tơhrik tơnêi têa, Đảng ƀă Chin phuh Việt Nam tơtrŏng khât troh tơdroăng ki mơjiâng krá tơniăn dêi kơvâ têa châu têa kơxăng Việt Nam, malối cho mơjiâng kơmăi kơmok ing hyôh khía.

Tung mê, mơhnhôk tơdroăng ki ‘no liăn cheăng chiâ hrik têa châu têa kơxăng a tơnêi Việt Nam, malối cho kơpong têa trâu, hngế ing kĭng, kơjo kum ăm tơdroăng ki chiâ hrik sap ing tơnêi Việt Nam ăm tíu ki mơjiâng bro on tơhrik ƀă kơmăi kơmok, kuăn pơlê xúa.