Kơxo hâi lơ 19/12, a tơraih tơƀai Gia Lâm (pơlê krâm Long Biên, Hà Nội) pôa Phạm Minh Chính, Ngế pro xiâm hnê ngăn Chin phuh veăng leh pơxiâm po Mơđah tơbleăng um tơmeăm Lêng lâp plâi tơnêi Việt Nam 2024. Tơdroăng leh pơxiâm po ai pơxá “Việt Nam - Hơniâp - Tơrŭm- Mơnhông”  ƀă 2.400 ngế kăn ƀô̆, mâu lêng dêi khu lêng kuăn pơlê Việt Nam lo ing mâu khu lêng Đặc công, Lêng gak tơkăng kong ƀă Khu lêng hơdruê xuăng  mơđah.

Tơbleăng a rôh leh, pôa Phạm Minh Chính, Ngế pro xiâm hnê ngăn tơnêi têa tối nhên, Mơđah tơbleăng um tơmeăm Khu lêng Lâp plâi tơnêi Việt Nam 2024 ai pơxúa kân, po klăng rôh tơbâ 80 hơnăm Hâi mơjiâng Khu lêng Kuăn pơlê Việt Nam ƀă 35 hơnăm Hâi leh Khu lêng gak tơkăng  kong tâi tâng kuăn pơlê. Kố cho hâi leh kân lâp plâi tơnêi ƀă tơdroăng pơxá “Việt Nam - Hơniâp - Tơrŭm - Mơnhông”, veăng mơhnhôk po tơpui tơno ƀă tơrŭm cheăng lêng tung tâi tâng mâu kơvâ cheăng; xua vâ hơniâp, tơniăn, tơrŭm ƀă mơnhông tơƀrê a kơpong ƀă tung lâp plâi tơnêi.

Việt Nam hbrâ vâ pêi mâu tơdroăng mơnhông cheăng kơmăi kơmok ‘na lêng hbrâ, mơ-eăm ing ivá tơná, pêi cheăng tiô túa nếo hlối tơrŭm ƀă lâp plâi tơnêi; nếo mơdêk ‘na cheăng lêng, hlối mơnhông cheăng kâ, pêi tơdroăng cheăng ai pơxúa ăm tơnêi têa ƀă ăm tơdroăng rêh ối dêi kuăn pơlê.