VOV4.Xơ Đăng - Kơmăng lơ 27/3, pôa Phạm Minh Chính, Ngế pro xiâm hnê ngăn Chin phuh veăng leh tơbâ 30 hơnăm vêh mơjiâng kong pơlê Sóc Trăng (khế 4/1992 – 4/2022) ƀă tơdah Mê dái Hồ Chí Minh, tơbleăng pơlê kong kơdrâm Sóc Trăng cho tíu xiâm tê rôe mơdró tơmeăm ối má II ối tung kong pơlê Sóc Trăng. Xông tơpui a roh leh pôa Phạm Minh Chính tối rơdêi, klêi 30 hơnăm mơjiâng ƀă mơnhông mơdêk, Sóc Trăng kal mơnhên mâu tơmeăm ki ai hlâu vâ mơnhông ki phá tơ-ê, roh tơ’lêi hlâu má môi, ki tơ’lêi vâ tơbriât châ tơƀrê, mơnhông mơdêk rĕng, krá tơniăn ƀă tiô troăng tiô ivá kong pơlê cho pơkâ, troăng pêi ton xŏn, troăng pêi ki xiâm, ton xŏn ƀă mơngế pakong veăng tŏng kum há cho kal khât.

Pôa Phạm Minh Chính, Ngế pro xiâm hnê ngăn tơnêi têa veăng leh tơbâ 30 hơnăm vêh mơjiâng kong pơlê Sóc Trăng

Ngế pro xiâm hnê ngăn tơnêi têa pơkâ thế, Sóc Trăng kal pơtối rak, thăm pro tơniăn ƀă pro thăm tơrŭm môi tuăn tung Đảng ƀô̆, khu râ kăn pơkuâ, thăm mơdêk ivá rŭm môi tuăn pơla mâu hdroâng mơngế. Tơkŭm pêi pro châ tơƀrê mâu tơdroăng Pơkâ dêi Kuô̆k hô̆i, Chin phuh ‘na hbrâ, mơdât pơreăng COVID-19 ƀă rak tơniăn, mơnhông cheăng kâ – rêh ối pơlê pơla; pêi kêi đeăng rĕng tơdroăng pâk vaccine trum má 3 ăm mơngế sap ing 18 hơnăm tơngi klêng, ăm vâi hdrêng sap ing 5 troh pá kơdâm 12 hơnăm tung hneăng má péa (khế 4,5,6/2022).

A Sa Ly tơplôu [ă tơbleăng