VOV4.Xơ Đăng - Klăng roh veăng Hneăng hôp khu râ kăn xiâm má môi ASEAN – Mih, lăm pôu ƀă pêi cheăng a kong têa Mih ƀă Khu lâp kong têa, a pơlê kong xiâm Washington, D.C, pôa Phạm Minh Chính, Ngế pro xiâm hnê ngăn Chin phuh hiăng troh lăm pôu ƀă ai ƀai xông tơpui ki kal ‘na troăng hơlâ a Tíu xiâm hriăn plĕng troăng pêi ton xŏn ƀă Lâp plâi tơnêi Mih. Tung ƀai xông tơpui, Ngế pro xiâm hnê ngăn tơnêi têa mơnhên, tơdroăng ki môi tuăn, môi hiâm mơno ƀă pôu râng hnoăng cheăng ki má môi ki kal vâ tơleăng mâu tơdroăng pơkâ ƀă lâp plâi tơnêi nôkố.

Ngế pro xiâm hnê ngăn tơnêi têa tối nhên, cho khu tơrŭm cheăng ki păng ‘nâng, ai hnoăng tung ASEAN ƀă mâu kong têa lâp plâi tơnêi, Việt Nam đi đo mơ-eăm veăng kum tơpui tơno ƀă tơrŭm cheăng, hbrâ veăng hnoăng hbrâ, thăm pêi pro, tơtro ƀă tơmeăm ki ai hlâu ƀă tíu cheăng dêi tơná. Việt Nam đi đo pói vâ thăm tơrŭm cheăng ƀă Mih ing tơdroăng môi hiâm mơno, pơtối thăm loi tơngah, thăm pôu râng hnoăng cheăng dêi péa pâ, xua pơxúa tơdjuôm dêi kuăn pơlê péa tơnêi têa, xua hơniâp lĕm, tơrŭm ƀă mơnhông mơdêk dêi kơpong ƀă lâp plâi tơnêi.

A Sa Ly tơplôu ƀă tơbleăng