A rôh trâm Ngế pro xiâm hnê ngăn kong têa Kul, péa pâ hiăng môi tuăn kô tơbleăng tơƀrê mâu tơdroăng tơkêa hiăng kĭ pơla péa tơnêi; thăm mơdêk tơrŭm cheăng, tơdjêp pơla péa kong têa cheăng kâ, veăng kum dêi rơpó mơjiâng tơdroăng cheăng kâ tơniăn krê, tơtro ƀă tơdroăng mot tơrŭm cheăng ƀă lâp plâi tơnêi trâu hơngế, ai pơxúa ƀă tơƀrê.

A rôh trâm kăn xiâm pơkuâ kong têa Philippines, prế kăn xiâm pơkuâ tối nhên tơdroăng ki rơhêng vâ thăm mơdêk tơrŭm pơla Việt Nam ƀă Philippines vâ teăm hbrâ ví ƀă mâu tơdroăng ki hơ’lêh ôh tá tơniăn dêi tơdroăng cheăng lâp plâi tơnêi ƀă tung kơpong tung pơla hdrối nah.

Tung rôh trâm pôa Lý Hiển Long, Ngế pro xiâm hnê ngăn kong têa Singapore, péa ngế kăn xiâm pơkuâ hiăng rơtế tối rơdêi thăm mơdêk trâm mâ vâ séa ngăn ƀă tơno túa pơkâ tŏng kum mâu tơdroăng xơpá, tơvâ tơvân ƀă pro tơ’lêi hlâu ăm tơrŭm cheăng tung mâu kơvâ cheăng.

Péa Ngế pro xiâm hnê ngăn tơnêi têa hiăng tơpui ‘na túa pơkâ tơmiât troh mơdêk tơrŭm cheăng pơla péa tơnêi têa tâk troh kong têa tơrŭm cheăng tung la ngiâ tŭm têk ƀă tung pơla ki tơtro. Péa ngế kăn pơkuâ hiăng tơpui tơno ‘na mâu tơdroăng ki kơjo kum, tơdroăng ki kal tung mơnhông tơrŭm cheăng kâ Việt Nam – Singapore.