Xông tơpui a roh hôp mê, Ngế pro xiâm hnê ngăn séa  mơnhên ngăn khât, hâk kơdĕn mâu hnoăng cheăng ki kal kân ki hiăng pêi pro dêi kơvâ hnê hriâm ƀă hnê mơjiâng tuăn ngôa rơkê tung hơnăm hriâm 2022-2023, mơhno tối tơdroăng ki hâk git, pôu râng dêi hnoăng cheăng, khŏm mơ-eăm, kơdo mơ-eăm pêi pro dêi tâi tâng khu hnê hriâm.

‘Na hnoăng cheăng, tơdroăng vâ pêi pro tung hơnăm hriâm nếo, Ngế pro xiâm hnê ngăn pơkâ thế mâu khu râ, kơvâ cheăng, kơ koan, kong pơlê, pơlê kong kân pơtối seá mơnhên ngăn, ‘mâi hơ’lêh, mơjiâng bro tơ’nôm túa cheăng, troăng hơlâ, túa pêi, kum mơ’no mâu túa, troăng hơlâ vâ tơtro ăm tơdroăng ki rak vế, pêi pro tiô luât, vâ ing mê ah, rế hía rế hơ’lêh nếo tung hnoăng hnê hriâm ƀă hnê mơjiâng tuăn ngôa rơkê, pêi pro tơƀrê tung pơkuâ ngăn dêi tơnêi têa ‘na kơvâ hnê hriâm, thăm mơdêk ki tơƀrê tung pơkuâ dêi hnoăng tơnêi têa tung hnê hriâm.

Ki rơhêng vâ tối, Ngế pro xiâm hnê ngăn pơkâ thế, Tơkŭm pêi pro lĕm tro hnoăng mơgêi 10 hơnăm rak vế, pêi pro tiô Tơdroăng pơkâ 29 dêi Tíu xiâm tơnêi têa ‘na hơ’lêh nếo, tŭm têk dêi Khu cheăng ‘na hnê hriâm ƀă hnê mơjiâng tuăn ngôa rơkê; Pơtối hriăn  plĕng, pêi pro klêi tơniăn, mơnhông tơdroăng hnê hriâm phôh thong hơnăm 2018 tơtro ƀă kơvâ pơkâ thế, tơtro khât; Mơjiâng, ‘mâi hơ’lêh, mơjiâng pro tơ’nôm mâu troăng hơlâ, troăng pơkâ tŏng kum ki tơtro ƀă khu thái cô ăm i tơtro; Thăm mơdêk tơdroăng tối pơtâng, hnê mơhno ‘na troăng pơkâ, troăng tơdjâ, troăng hơlâ, hnoăng tŏng kum hơ’lêh nếo ‘na kơvâ hnê hriâm, mơjiâng tơdroăng ki môi tuăn dêi rêm khu râ kuăn pơlê.