VOV4.Xơ Đăng - Kơmăng lơ 31/5, a Hngêi vâi hdrêng Hà Nội, pôa Phạm Minh Chính, Ngế pro xiâm hnê ngăn Chin phuh veăng Leh mơhnhôk khế lo pêi tơdroăng cheăng xua vâi hdrêng ƀă pơxiâm po rơnó pơtê hriâm hơnăm 2022 ƀă dó inâi: ‘’Tơdjuôm ivá rak ngăn, hnê hriâm ƀă gak kring vâi hdrêng’’ vâ mơhnhôk tơdroăng ki veăng hên tâ mê nếo mâu khu cheăng kal kí – rêh ối pơlê pơla, Khu tơrŭm pơlê pơla, rơpŏng ƀă pơlê pơla tung tơdroăng rak ngăn, hnê hriâm ƀă gak kring vâi hdrêng.

Roh leh ai dâng 1.200 kăn teăng mâ, tung mê ai vâ chê 700 ngế vâi hdrêng teăng mâ ăm lối 25 rơtuh ngế vâi hdrêng tung lâp tơnêi têa veăng. Xông tơpui a roh leh, pôa Phạm Minh Chính, Ngế pro xiâm hnê ngăn Chin phuh rơkâu 700 ngế muăn ai mâ teăng mâ a kố ƀă 25 rơtuh ngế vâi hdrêng tung lâp tơnêi têa rơtế rơpŏng, mâu thái cô ivá mo sêi têi ‘răng, hơniâp lĕm, mâu muăn môi hneăng pơtê rơnó pơtê hriâm kơnía, phiu ro, pơxúa.

Klăng hâi Lâp plâi tơnêi vâi hdrêng lơ 1/6, Leh mơhnhôk Khế lo pêi tơdroăng cheăng xua vâi hdrêng ƀă pơxiâm po rơnó pơtê hriâm hơnăm 2022, pôa Phạm Minh Chính ƀă khu râ kăn pơkuâ mâu khu xiâm, kơvâ cheăng ƀă khu râ kăn pơkuâ Vi ƀan pơlê kong kân Hà Nội hiăng lăm pôu mâu ngế châi ta mo dế pơlât a Tíu xiâm pơlât ŭm tung châ ƀă mâu vâi hdrêng châi tamo dế pơlât ivá klêi kơ’nâi prêi lĕm COVID-19 a Hngêi pơkeăng pơlât vâi hdrêng tơnêi têa.

A Sa Ly tơplôu ƀă tơbleăng