VOV4.Xơ Đăng - Kơxê lơ 29/5, pôa Phạm Minh Chính, Ngế pro xiâm hnê ngăn Chin phuh ƀă Khu kăn ki pêi dêi hnoăng cheăng tung Chin phuh ai rôh pêi cheăng ƀă Khu pơkuâ hnê ngăn Đảng Sơn La ‘na klêi kơ’nâi mơnhông mơdêk cheăng kâ rêh ối pơlê pơla, rak vế tơniăn gak kring pơlê pơla cheăm bêng, mơjiâng khu pơkuâ tơdroăng kal kí hơnăm 2021 ƀă mâu khế apoăng hơnăm 2022, túa pơkâ vâ pêi pro, hnoăng cheăng tung la ngiâ.

Pôa Phạm Minh Chính pêi cheăng ƀă Khu pơkuâ hnê ngăn Đảng Sơn La

Tơpui a rôh pêi cheăng, pôa Phạm Minh Chính khĕn kơdeăn ƀă mơnhên tối khât Đảng ƀô̆, Khu kăn pơkuâ ƀă kuăn pơlê Sơn La hiăng pêi klêi tung pêi pro hnoăng cheăng mơnhông mơdêk cheăng kâ rêh ối tung pơla hdrối nah, veăng kum mơnhông dêi tơnêi têa.

‘Na túa tơmiât pơkâ thế pêi pro tung la ngiâ, pôa Phạm Minh Chính pơkâ thế pơtối séa ngăn, pêi pro kơhnâ tơdâng tơ’mô, tơƀrê tơdroăng Pơkâ hneăng hôp 13 dêi Đảng, pơkâ hneăng hôp Đảng ƀô̆ kong pơlê, mâu tơdroăng pơkâ ki kal dêi Tơnêi têa, tung mê ai mâu tơdroăng pơkâ ki hiăng vâ châ pơkâ ‘na tơnêi tơníu, ‘na pêi chiâk deăng, kuăn pơlê pêi chiâk deăng, thôn pơlê ƀă ‘na cheăng kâ khu pú hên, Tơdroăng pơkâ dêi Khu xiâm pơkuâ tơdroăng kal kí ‘na túa pơkâ mơnhông mơdêk cheăng kâ rêh ối pơlê pơla, rak vế tơniăn gak kring kơpong thông ƀă peăng kong ngo Pá Kơnhŏng.

Katarina Nga tơplôu ƀă tơbleăng