VOV4.Xơ Đăng - Kơxê lơ 31/5, a tíu pêi cheăng Chin phuh, pôa Phạm Minh Chính, Ngế pro xiâm hnê ngăn Chin phuh hiăng tơdah pôa Pascal Soriot, kăn pơkuâ Grup pơkuâ AstraZeneca drêng kăn pơkuâ AstraZeneca pôu ƀă pêi cheăng a Việt Nam tiô rơkong krếo thế dêi Ngế pro xiâm hnê ngăn Chin phuh. A rôh tơdah, poa Phạm Minh Chính mơnhên tối khât hnoăng cheăng ƀă ivá veăng kum dêi Grup pơkuâ AstraZeneca tung tơdroăng ki mơ-eăm hbrâ mơdât pơreăng COVID-19 tung lâp plâi tơnêi ƀă a Việt Nam.

Ngế pro xiâm hnê ngăn tơnêi têa mơnê tơdroăng tơrŭm cheăng krá ƀă tơƀrê pơla AstraZeneca prếi Việt Nam tung pơla hdrối nah, malối cho ngế krê pôa Pascal Soriot hiăng tơmâng ngăn hnê mơhno AstraZeneca kum vâ chê 30 rơtuh klŏng vaccine hbrâ mơdât COVID-19 ăm Việt Nam tung hơnăm 2021. Phiu ro pơkâ po rơdâ ‘no liăn cheăng ƀă tơdroăng tơkêa tơrŭm cheăng mơjiâng pro pơkeăng kơnâ 90 rơtuh dollars a Việt Nam, Ngế pro xiâm hnê ngăn tơnêi têa tối, phiu ro ‘na tơdroăng ki Khu xiâm ngăn pơkeăng pơlât prếi Kŏng ti AstraZeneca Việt Nam dế tơpui tơno vâ pêi pro troh tơdroăng ki kĭ tơkêa hlá mơéa chôu vế ‘na tơrŭm cheăng pơla péa pâ. Kố cho tơdroăng ki vâ AstraZeneca tơrŭm cheăng ton xŏn a Việt Nam, mơhno tối tơhrâ rơtế ƀă Việt Nam tung mơnhông mơdêk krá tơniăn.

       Katarina Nga tơplôu ƀă tơbleăng