VOV4.Xơ Đăng - Drêng veăng hôp a Rôh hôp khu râ kăn xiâm ki tơviah ASEAN – Mih, pôu ƀă pêi cheăng a Mih ƀă Khu lâp kong têa, hâi lơ 12/5, pôa Phạm Minh Chính, Ngế pro xiâm hnê ngăn tơnêi têa pin hiăng tơdah pôa Scott A. Nathan, kăn xiâm pơkuâ Kơ koan liăn ngân mơnhông kong têa Mih (DFC). Ngế pro xiâm hnê ngăn tơnêi têa pâ thế DFC pơtối tŏng kum Việt Nam tung mâu kơvâ cheăng on tơhrik ki vêh mơjiâng pro, hbrâ ví ƀă kong prâi pro hơ’lêh, hơ’lêh kơxô̆; ‘mâi mơnhông mâu tơdroăng ki trâm klêi rôh tơplâ.

Tâ tá rôh tơdah

Ngế pro xiâm hnê ngăn tơnêi têa xuân pơkâ thế mơdêk tơrŭm cheăng mơnhông krá tơniăn ton kroăng Mekong tung pơla têa kơxĭ tâk đik, mơdêk tơdroăng rêh ối liăn ngân hiâm mơno kuăn pơlê tung kơpong. Mơnhên tối khât kế tơmeăm ki ai hlâu, tơdroăng loi tơngah tơrŭm cheăng ‘na cheăng kâ ƀă Việt Nam, pôa Scott A. Nathan ăm ‘nâi hên tơdroăng tơkêa tơrŭm pơla péa pâ hiăng châ tơbleăng tơƀrê.

Tung la ngiâ, DFC rơhêng vâ châ mơdêk tơrŭm tung mâu kơvâ cheăng hbrâ ví ƀă kong prâi pro hơ’lêh, on tơhrik ki vêh mơjiâng pro, mơnhông tung kơpong kroăng Mekong.