VOV4.Xơ Đăng - Kơxê lơ 27/5, pôa Phạm Minh Chính, Ngế pro xiâm hnê ngăn tơnêi têa hiăng tơdah pôa Patrick Gelsinger, kăn pơkuâ Grup Intel a tíu pêi cheăng Chin phuh. Pôa Phạm Minh Chính mơnhên tối khât grup pơkuâ Intel rế hía rế mơnhông rơdei ƀă hiăng tơmâng ngăn, ‘no liăn cheăng a Việt Nam tung lối 15 hơnăm hdrối, ăm kŏng ti krâ ‘măn ƀă pơkâ xúa dêi Intel a Kơpong cheăng ƀă kơmăi kơmok rơxông nếo Pơlê kong kân Hồ Chí Minh pơxiâm pêi cheăng sap ing hơnăm 2010. Kố cho tơdroăng tơkêa ‘no liăn cheăng kân má môi dêi Mih a Việt Nam, hiăng veăng kum ăm tơdroăng cheăng kâ kơpong pơlê kong kân tối krê ƀă Việt Nam tối tơdjuôm, tơdrêng ƀă ôh tá tơdrêng tăng cheăng pêi ăm lối rơpâu ngế.

Ngế pro xiâm hnê ngăn tơnêi têa pơkâ thế Intel pơtối mơdêk ‘no liăn cheăng a Việt Nam tung hneăng ki nếo, tơƀrê tâ, pơxúa tâ, tơtro ƀă troăng hơlâ dêi Chin phuh tung tơ’mot ‘no liăn cheăng xúa kơmăi kơmok rơxông nếo, kơmăi kơmok krúa, veăng kum tung tơdroăng ki hơ’lêh kơxô̆.

Katarina Nga tơplôu ƀă tơbleăng