A hneăng hôp tơpui tơno, péa Ngế pro xiâm hiăng tơpui tơno tâi tâng ‘na tơdroăng mơnhông cheăng kâ – rêh ối pơlê pơla rêm tơnêi têa, mâu troăng mơdêk tơrŭm cheăng pơla péa pâ ƀă mâu tơdroăng lâp plâi tơnêi, kơpong rơtế rơhêng vâ ‘nâi plĕng.

Ngế pro xiâm hnê ngăn kong têa Hà Lan tối hâk mâu tơdroăng châ tơƀrê dêi Việt Nam tung rak pro tơniăn ƀă mơnhông cheăng kâ – rêh ối pơlê pơla klêi kơ’nâi tâi pơreăng kân COVID-19 ƀă sap ing roh lăm pôu pêi cheăng hơnăm 2019 dêi pôa. Péa Ngế xiâm kheăn kơdeăn mâu tơdroăng mơ-eăm dêi péa pâ tung tơdroăng pêi pro tơkêa ƀă môi tuăn tơrŭm cheăng hiăng châ kĭ.

Péa ngế pro xiâm hnê ngăn tơnêi têa môi tuăn thăm loi tơngah kal kí ing tơpui tơno khu râ kăn xiâm, pơtối pêi pro châ tơƀrê mâu troăng pơkâ pêi ƀă môi tuăn tơrŭm cheăng pơla péa pâ, tơdrêng amê hriăn plĕng mơjiâng mâu troăng pơkâ pêi nếo vâ pro trâu hơngế tơdroăng cheăng pơla péa tơnêi têa; mơnhên cheăng kâ – tê mơdró cho ki xiâm kal khât tung tơrŭm cheăng pơla péa tơnêi têa, môi tuăn pơtối pêi pro tŭm, châ tơƀrê Pơkâ Tê mơdró tơniăn krê Việt Nam – EU (EVFTA).

Péa Ngế pro xiâm pơkuâ môi tuăn pơtối mơdêk tung tơdroăng tơpui tơno troăng pêi cheăng ton xŏn ‘na kâi trâng kong prâi hơ’lêh, pơkuâ tơnêi têa, pêi chiâk deăng krá tơniăn, kum tơdjuôm ivá hbrâ mơdât ƀă mâu pơloăng mơnúa lâp plâi tơnêi. Klêi kơ’nâi tơpui tơno, péa ngế pro xiâm hnê ngăn tơnêi têa hiăng châ hlo Leh pơcháu 4 mơ-éa ki kal tơrŭm cheăng pơla mâu khu xiâm, kơvâ cheăng, khu tơrŭm péa tơnêi têa tung mâu kơvâ séa ngăn ƀă xúa krá tơniăn mâu tơmeăm tung kơdâm tơnêi ki kal, xo hnoăng liăn tơmeăm tê rôe ngi kong têa ê, mơ’no liăn cheăng, tê mơdró.