VOV4.Xơ Đăng - Kơxê lơ 5/5, a Hngêi Kuô̆k hô̆i, Vi ƀan pơkuâ Kuô̆k hô̆i tơkŭm po Leh tơbleăng ƀă diâp Pơkâ pôk tơ’nôm pôa Phạm Thái Hà ối rak dêi hnoăng pro kăn xiâm phŏ pơkuâ Ƀơrô cheăng Kuô̆k hô̆i, hlối cho ngế kum cheăng ăm Kăn xiâm hnê ngăn Kuô̆k hô̆i. Teăng mâ Vi ƀan pơkuâ Kuô̆k hô̆i, pôa Trần Thanh Mẫn, kăn xiâm phŏ hnê ngăn Kuô̆k hô̆i rơkâu tâi tâng kăn pơkuâ Ƀơrô cheăng Kuô̆k hô̆i hiăng châ pôk tơ’nôm, séa ngăn mâu ngế cheăng pơkuâ ƀă rơkâu pôa Phạm Thái Hà châ Vi ƀan pơkuâ Kuô̆k hô̆i loi tơngah, pôk ƀă ‘mot tơ’nôm rak vế hnoăng cheăng cho kăn phŏ pơkuâ Ƀơrô cheăng Kuô̆k hô̆i.

Kăn xiâm phŏ hnê ngăn Kuô̆k hô̆i loi tơngah tâi tâng kăn pơkuâ, kăn ƀô̆, kong chưk, mâu ngế pêi cheăng a Ƀơrô cheăng Kuô̆k hô̆i đi đo tơmâng ngăn, môi tuăn, tơrŭm vâ mơjiâng môi khu pú hên krá rơdêi kơhnâ tung tâi tâng; đi đo mơhno tối tơdroăng ki tơdrăng, khoa hok tung xing xoăng tơdroăng cheăng, pơcháu hnoăng cheăng, xing xoăng tơdroăng cheăng tơƀrê.

Katarina Nga tơplôu ƀă tơbleăng