VOV4.Xơ Đăng - Vâ hbrâ ăm hneăng hôp má 3, Kuô̆k hô̆i hneăng má 15, kơxê lơ 28/4, pôa Phan Đình Trạc, ngế cheăng tung khu xiâm pơkuâ tơdroăng kal kí, kăn pơkuâ ngăn Tíu xiâm Đảng, Kăn xiâm pơkuâ Tơnêi têa rơtế ƀă mâu kăn Kuô̆k hô̆i kong pơlê Lâm Đồng hiăng ai rôh trâm mâ kuăn pơlê a cheăm Xuân Thọ, pơlê kong kơdrâm Đà Lạt.

A rôh trâm mâ kuăn pơlê, teăng mâ Khu kăn Kuô̆k hô̆i tíu pêi cheăng a kong pơlê Lâm Đồng hiăng tơbleăng ‘na mâu tơdroăng ki kal dêi hneăng hôp la ngiâ, tơdrêng amê hlối tối tơbleăng klêi kơ’nâi cheăng kâ rêh ối pơlê pơla hneăng má 1 hơnăm 2022.

Tiah mê, maluâ tro tơdjâk ing pơreăng kân COVID-19 la kơnôm ing tơbleăng tơdâng tơ’mô hên troăng hơlâ tung tơdroăng hơ’lêh nếo, cheăng kâ rêh ối pơlê pơla dêi tơnêi têa hiăng rĕng ‘mâi mơnhông. Tung mê, mơdêk GDP châ chía hên, tiô riân tâk 5,03%, kơpong tê mơdró tâk 4,58%, tâk vâ chê 1,5 hdroh tâng pơchông ƀă khế kố dêi mâu hơnăm 2020 – 2021.

Pôa Phan Đình Trạc, kăn pơkuâ ngăn tíu xiâm Đảng trâm mâ kuăn pơlê

Krê kong pơlê Lâm Đồng, nâp liăn tơnêi têa tung 4 khế apoăng hơnăm châ lối 4.700 rơtal liăn, tâk 4,76% tâng vâ pơchông ƀă khế kố hơnăm; tơmối ôm hyô châ lối 2,3 rơtuh ngế, tâk 33% tâng pơchông ƀă khế kố hơnăm 2021. Kuăn pơlê pơtối pâ thế mâu tơdroăng ki ôh tá tơniăn dế trâm rêm râ, mâu kơvâ cheăng tơmâng ngăn ‘mâi rơnêu, mê cho: tơdroăng ki hbru ăm hlá mơ-éa hnoăng rak xúa tơnêi ối hrá, hnoăng cheăng pơlâ xúa tơnêi tá hâi nhên, tơdrăng, kơxô̆ liăn mung cheăng kâ xơpá vâ châ mung.

Katarina Nga tơplôu ƀă tơbleăng