Kuăn pơlê cheăm Ka Đơn, tơring Đơn Dương tối tơdroăng ki môi tuăn, loi tơngah ƀă kheăn kơdeăn tơdroăng châ tơƀrê pêi pro tơdroăng hbrâ mơdât kâ kơhveăm liăn ngân, ki rơhêng vâ tối cho khŏm mơ-eăm tung pêi pro rah tŭm tro mơngế pêi cheăng dêi Đảng, Tơnêi têa.

Tơdrêng amê, kuăn pơlê pâ thế troh Khu râ kăn teăng mâ Kuô̆k hô̆i kong pơlê Lâm Đồng hên tơdroăng ki pá puât nếo ai tung pêi pro Luât tơnêi tơníu, Luât khu tơrŭm cheăng, tơdroăng ăm mung, ăm dêi pó, pro yă tơnêi ƀă mâu kŏng trương. Tiô pôa Phan Đình Trạc, Kăn pơkuâ tơdroăng xiâm Tơnêi têa, kố cho mâu tơdroăng ki kal, tơdjâk troh tơdroăng pêi cheăng pêt mơjiâng ƀă tơdroăng rêh ối dêi kuăn pơlê, kal châ mâu kơvâ cheăng, mâu râ tơmêng tơleăng.

Tung mê, nhôm ôh tá tro tung pro mâu mơ-éa rêh ối cheăng kâ, pâ ki kố ki tá kuăn pơlê, kal châ pro mơnhên ƀă pơxâu phâk kơtăng.