Tung kơxô̆ vâ chê 40 ngế kuăn pơlê veăng tối tơbleăng a rôh trâm mâ kuăn pơlê, ki hên tối tơdroăng tơbriât tơnêi pơla mâu kuăn pơlê ƀă mâu kŏng ti, khu mơdró châ tơnêi têa pơcháu tơnêi. Tiô kuăn pơlê, tơdroăng tơvâ tơvân, tơbriât tơnêi mê hiăng pro ton chât hơnăm la xuân hâi châ tơmâng tơleăng mơnhên klêi.

Hlo mâu tơdroăng ki tơdjâk troh rak ngăn, xúa ƀă tơbriât tơnêi a cheăm Ninh Gia pá puât ton khế hơnăm, pôa Phan Đình Trạc, Ngế pơkuâ hnê ngăn tíu xiâm Đảng, Ngế pơkuâ tơdroăng cheăng xiâm tơnê pơkâ thế mâu kăn Lâm Đồng thâ séa ngăn, pơxâu kơtăng mâu ngế pro xôi. Ƀă mâu tơdroăng ki cho râ kăn, khu kăn Kuô̆k hô̆i kong pơlê Lâm Đồng kô ai hlá mơ-éa pơkâ thế Ngế xiâm pơkuâ ngăn lêng veăng tơmâng tơleăng mơnhên.