A rôh trâm mâ, kuăn pơlê púi vâ, tơngah Đảng, Kuô̆k hô̆i ƀă Chin phuh pơtối ai mâu troăng tĭng gum tơtro mơdêk tơdroăng cheăng kâ mơnhông. Tung mê, tơmâng ngăn troh mâu troăng hơlâ tŏng gum ‘na tơdroăng cheăng pêi, hngêi ối, mâu tơdroăng túa lĕm tro, tơ’noăng ivá, tŏng gum hnê cheăng pêi, tŏng gum drêng kŏng nhân pêi cheăng hía tơdroăng cheăng, pơtê pơtân tơkêa pêi cheăng ƀă hên ki ê.

Kuăn pơlê xuân pâ thế kal ai mâu troăng hơlâ tŏng gum tơtro ƀă mâu tơdroăng ki hrá nâp, hmuâ ôh tá vâ nâp ƀaoh hiêm ôh tá ai cheăng pêi, ƀaoh xah hô̆i ăm mâu ngế pêi cheăng; tâk kơlo châ kâ liăn ôh tá ai cheăng pêi rêm khế, troăng tŏng gum krê ƀă mâu kong chưk, viên chưk, ngế pêi cheăng tung mâu tíu cheăng khăm pơlât kong lâp.

Tơpui a rôh trâm mâ kuăn pơlê,  pôa Phan Đình Trạc, ngế xiâm pơkuâ cheăng tơnêi têa tối tiah kố, mâu rơkong tơpui, pâ thế dêi kuăn pơlê cho tơxâng. Khu kăn Kuô̆k hô̆i kong pơlê Lâm Đồng kô tơmâng xo, chêh ‘măn  ƀă ai rơkong tối ăm mâu kơ koan râ Tơnêi têa.