Hneăng hôp tơpui tơno Kih thuât – cheăng lêng lâp plâi tơnêi 2023 cho môi tung mâu tíu mơđah tơbleăng pháu hnêa, hbrâ kih thuât lâp plâi tơnêi ki kân má môi lâp plâi tơnêi xua Khu xiâm pơkuâ lêng kong têa Rusi tơkŭm po tiah hmâ rêm hơnăm sap hơnăm 2015 a Kơdrum reăng pâ nhuô̆m tơnêi têa – xah hêi Patriot (pakong pơlê kong xiâm Moskwa).

Hdrối mê, Đăi tươ̆ng Phan Văn Giang rơtế ƀă khu râ kăn teăng mâ râ xiâm Khu xiâm pơkuâ mô đô̆i Việt Nam xuân hiăng troh lăm pôu Kơ koan teăng mâ Việt Nam a kong têa Rusi. Đăi tươ̆ng Phan Văn Giang tối pói vâ tung la ngiâ, kăn ƀô̆, nhân viên Kơ koan teăng mâ Việt Nam a kong têa Rusi pơtối mơnhông hiâm mơno rŭm môi tuăn, tơmiât pêi rơkê, nhuô̆m tuăn ngôa rơkê khu pú hên, pêi pro tro hnoăng cheăng Đảng, Tơnêi têa pơcháu, kum thăm tơrŭm cheăng ton xŏn ƀă kong têa Rusi tung mâu kơvâ cheăng, tung mê ai tơrŭm cheăng lêng.