Tung rôh lăm pôu Singapore, kơxo hâi lơ 13/3 môi tung mâu container ki kân má môi kơpong Đông Nam Á vâ tăng ‘nâi plĕng túa mơnhông pro kơno tuk dêi Singapore. A kơno tuk Pansir Panjang, pôa Tô Lâm, Kăn xiâm pơkuâ hnê cheăng Đảng ƀă mâu kăn châ pôa Nelson Quek, Ngế pơkuâ kơpong Đông Nam Á ƀă mâu kăn dêi Grup PSA Singapore tơbleăng ăm ‘nâi ‘na tơdroăng mơnhông, mâu hnoăng hiăng pêi pro châ tơƀrê ƀă troăng hơlâ mơnhông tơƀrê tung la ngiâ dêi kơno Tuk.

Pôa Tô Lâm Kăn xiâm pơkuâ hnê cheăng Đảng rơkâu ƀă khĕn kơdeăn mâu hnoăng pêi pro dêi kơno tuk ƀă ăm ‘nâi hơnăm 2025, Việt Nam ai tâi tâng ki pơxúa tê rôe tơmeăm dâng 800 rơtal dollars hơnăm 2024 ƀă dế pêi tiô pơkâ 1.000 rơtal dollars, xua mê, troăng têa kơxĭ ƀă kơno tuk pro xiâm ki kal tung tơdroăng pro tơniăn pơkâ tê mơdró dêi Việt Nam.

Ing mê, Kăn xiâm pơkuâ hnê cheăng Đảng púi vâ PSA rĕng ai mâ  a Việt Nam vâ tơrŭm mơnhông kơno tuk a Việt Nam xua Singapore rơkê pêi ‘na tơdroăng mê ai pơxúa ƀă Việt Nam tung tơdroăng tơrŭm cheăng tiô túa nếo  ‘na pro kơno tuk ƀă mơnhông kơvâ cheăng logistic.