A rôh tơdah, Kăn xiâm pơkuâ hnê cheăng Đảng tối nhên, hneăng lăm pôu vâ mơnhông tơrŭm cheăng tung tŭm tơdroăng cheăng, malối cho tơrŭm cheăng kâ ƀă Indonesia. Việt Nam mơhnhôk mâu khu mơdró ki má môi ‘no liăn pêi cheăng a Việt Nam ƀă púi vâ Indonesia pro tơ’lêi hlâu ăm mâu khu mơdró Việt Nam, ‘no liăn po rơdâ mâu tíu a Indonesia.

Tối troăng hơlâ môi tuăn ƀă mâu pơkâ ki Grup Ciputra dế tơbleăng a Việt Nam, Kăn xiâm pơkuâ hnê ngăn Đảng pơkâ thế Grup pơkuâ cheăng tơrŭm krá ƀă Việt Nam Vi ƀan kuăn pơlê dêi pơlê kong kân Hà Nội ƀă mâu kơ koan tơdjâk troh vâ tơbleăng mâu tơdroăng pơkâ; hlối mơhnhôk grup mê pơtối tăng ‘nâi plĕng tơbleăng mâu tơdroăng tơkêa bro ki nếo a Việt Nam, pơtối rak vế tâ nếo mâu kơvâ ki rơdêi tung tơrŭm ‘no liăn cheăng, ‘no hnoăng vâ Việt Nam pêi châ tiô pơkâ tâk tiô tơdroăng hiăng tối hdrối.

Xuân tung kơxê hnah, pôa Tô Lâm, Kăn xiâm pơkuâ hnê cheăng Đảng troh veăng leh tơbleăng troăng tơƀai kơneăng tơdrăng dêi Vietnam Airlines pơla Pơlê kong kân Hồ Chí Minh ƀă Denpasar, pơlê xiâm Bali sap khế 6 hơnăm kố, chiâng troăng kơneăng ki má 2 dêi Vietnam Airlines tơdjêp pơla Việt Nam - Indonesia, mơdêk kơxô̆ tơƀai kơneăng dêi khu tơƀai pơla péa tơnêi têa tâk 14 rôh rêm măng tĭng.