Péa ngế kăn xiâm pơkuâ hnê ngăn cheăng Đảng, Kăn xiâm hnê ngăn tơnêi têa rơtế tối phiu ro hlo mâu hvêa chêng prôk mơnhông tơniăn lĕm dêi tơrŭm cheăng pơla péa Đảng, péa tơnêi têa tung pơla hdrối nah, ki xiâm cho rôh tơpui tơno ‘na tơdroăng cheăng tung la ngiâ tơrá khu râ kăn xiâm, mâu troăng hơlâ tơrŭm cheăng rế hía rế tŭm têk, loi khât dêi rơpó; tơrŭm gâk kring – cheăng lêng pơhlêh sap ing trâm mâ tơpui tơno chiâng tơrŭm cheăng ai pơxúa khât; tơrŭm cheăng kâ, tê mơdró, ‘no liăn cheăng, tơdjêp troăng prôk hlo mơnhông tơƀrê khât; tơrŭm pơla kong pơlê, trâm mâ kuăn pơlê; tơrŭm tung hên kơvâ cheăng rế hía rế krá tơniăn.

Péa ngế kăn xiâm pơkuâ tối nhên, tung pơla ôh tá tơniăn dêi tơdroăng tung lâp plâi tơnêi, péa Đảng, péa tơnêi têa kal tơrŭm krá, thăm mơnhông loi khât tung cheăng la ngiâ, tơdjêp troăng hơlâ tŏng gum, tê mơdró, hngêi trăng, on tơhrik, pơtối pro trâu hngế, mơdêk tâ nếo tơrŭm cheăng Việt Nam - Sinuâ tung hneăng nếo, veăng gum pro pơxúa ăm hơniâp lĕm, tơrŭm cheăng ƀă mơnhông tung kơpong ƀă tung lâp plâi tơnêi.

‘Na túa pơkâ pêi mơnhông tơrŭm cheăng péa Đảng, péa tơnêi têa tung la ngiâ, péa ngế kăn xiâm hnê ngăn tối rơdêi kô pơtối hnê mơhno rêm râ, mâu kơvâ cheăng pêi pro kơtăng tiô mâu tơdroăng tơkŭm tâi tâng “06 lối”, rak vế tơdroăng ki trâm mâ tơpui tơno pơla mâu kăn, mơnhông tơƀrê pơxúa tung mâu kơvâ cheăng, ‘mâi mơnhông kơvâ cheăng Đảng, thăm mơnhông tơrŭm cheăng pơla péa pâ, tơrŭm krá tơniăn a mâu troăng hơlâ hên kơvâ cheăng, hbrâ mơdât ƀă tŏng gum tơniăn tâ mâu tơdroăng ki tá hâi pêi pro klêi, tơdroăng ki ôh tá môi tuăn.

A rôh hôp, péa ngế kăn xiâm pơkuâ păng ‘nâng tối tơbleăng pơxiâm po “Hơnăm tơrŭm ôm hyô Việt Nam - Sinuâ 2026 – 2027”, môi tuăn mơdêk rơdêi mâu tơdroăng tơrŭm cheăng, mơđah tơbleăng pơkâ mơdêk ôm hyô, tơrŭm ‘mêng pro troăng klông, tê mơdró ôm hyô, ‘mâi mơnhông ƀă rak vế krá rơdêi tíu ối cho kong têa tơmối troh ôm hyô hên má môi dêi rơpó.