A rôh tơpui tơno, pôa Tô Lâm, Kăn xiâm pơkuâ hnê ngăn cheăng Đảng tối rơdêi, Việt Nam đi đo ngăn nhuô̆m ƀă púi vâ ăm tơrŭm cheăng tơnêi têa tơrŭm tung la ngiâ tŭm têk pơla péa tơnêi têa mơnhông trâu hngế, tŭm têk, tơxâng ƀă tơdroăng tơrŭm cheăng nếo mơjiâng. Kăn xiâm pơkuâ hnê ngăn cheăng Đảng xuân rơkâu Singapore ‘na mâu tơdroăng ki hiăng pêi pro klêi tung mâu kơvâ cheăng, cho tơdroăng pêi ki lĕm tro ăm mâu kong têa Đông Nam Á tiô ƀối.

Péa ngế xiâm pơkuâ hiăng môi tuăn mơnhên tối, Việt Nam ƀă Singapore tơpui tối ăm dêi rơpó hên tơdroăng ki bô bối ‘na ki kơnía, túa lĕm tro ƀă troăng ngăn mơnhông ƀă tuăn tơmiât krê tơdjuôm tung hên tơdroăng tung a kơpong ƀă a kong têa ê. Péa pâ hơniâp ro hlo mâu tơdroăng ki châ rơhéa pơxúa tung tơrŭm cheăng pơla péa pâ tung pơla hdrối nah tung mâu kơvâ cheăng, sap ing tơdroăng kal kí, tơpui kâ troh tơrŭm cheăng lêng gâk kring, tê mơdró – ‘no liăn cheăng, khoa hok – kong ngê̆, hnê hriâm – hnê cheăng pêi, ôm hyô ƀă trâm mâ kuăn pơlê; po rơdâ troh mâu kơvâ cheăng ki nếo, hên tơdroăng ki ai hlâu môi tiah cheăng kâ kơxô̆, pơhlêh ngiât, pơhlêh on tơhrik ƀă pơhlêh nếo tơmiât pêi rơkê.