Kơxo lơ 30/12, pôa Tô Lâm, Kăn xiâm pơkuâ hnê ngăn cheăng Đảng troh veăng hôp ƀă pơkuâ po rôh trâm mâ mâu khu ki rơkê plĕng, khu ki hriăn ‘na khoa hok lâp tơnêi têa. Mâu kăn pơchuât tơbleăng mâu tơdroăng ki hiăng pêi pro klêi tung hriăn plĕng, xúa, hnê cheăng dêi mâu kơvâ cheăng ki kal môi tiah ngăn pơkeăng, pêi chiâk deăng, kơmăi kơmok chal nếo ƀă hên ki ê; tơdroăng cheăng tơ’mot, tơkŭm ƀă mơdêk hnoăng cheăng dêi khu ki rơkê plĕng, khu ki hriăn ngăn ‘na khoa hok ƀă pơkâ mơ’no, pâ thế ƀă Đảng ƀă Tơnêi têa. Tơpui a rôh trâm mâ, Kăn xiâm pơkuâ hnê ngăn cheăng Đảng tối nhên khu ki rơkê plĕng cho khu ki teăng mâ ăm khu ki ai tuăn mơno rơkê, khu ki rơkê dêi kuăn pơlê ƀă hdroâng kuăn ngo, cho môi tung mâu tơdroăng ki ƀă ivá mơ-eăm kal má môi pro pơxúa mơnhông tơƀrê ƀă tơdroăng kro mơdrŏng ăm tơnêi têa.

Pơkâ thế, khu râ pơkuâ hnê ngăn cheăng Đảng, khu kăn pơkuâ rêm râ, kal pơhlêh nếo rơdêi tơdroăng hnê cheăng, rah xo, xúa mâu ngế ki rơkê, khu ki hriăn ‘na khoa hok vâ pơtối mơjiâng ƀă mơdêk hnoăng cheăng dêi khu ki rơkê pêi pro châ tơdroăng púi vâ mơnhông tơnêi têa rĕng ƀă krá tơniăn.

Kăn xiâm pơkuâ hnê ngăn cheăng Đảng xuân pơkâ thế, khu ki rơkê, khu ki hriăn ‘na khoa hok tung lâp tơnêi têa rĕng mơ-eăm troh hơnăm 2030 athế ai 100 ngế ki ‘nâi mơjiâng pro, tơmiât rơkê, mâu tơdroăng khoa hok lâp plâi tơnêi; tơmeăm khoa hok, kong ngê̆, mơ-éa văn hok, ngê̆ thuât châ ối a ko. Troh hơnăm 2045, khu ki rơkê Việt Nam ối má môi kơpong, ối tung top xiâm lâp plâi tơnêi.