Lâp kong pơlê Kon Tum nôkố ai 35 khu tơrŭm cheăng, tôh tơrŭm cheăng, khu tê mơdró ƀă vâ chê 800 troăng pêi kơdroăng păn mơnăn xua mô đô̆i hneăng hdrối nah pơkuâ. Mâu troăng pêi păn ro, pu pái kăn dêi Khu mô đô̆i hneăng hdrối nah 2 tơring Ngọc Hồi, Đăk Glei; troăng pêi păn pah nâng ki vâ tê ôh tá ai trâm dêi Khu mô đô̆i hneăng hdrối nah tơring Sa Thầy; troăng pêi pêt loăng pơkeăng dêi Khu mô đô̆i hneăng hdrối nah tơring Tu Mrông, nếo cha tơƀrê hên cheăng kâ, rế châ po rơdâ vâ gum tơ’nôm hrĭng ngế mô đô̆i hneăng hdrối nah mơ-eăm hluăn ing kơtiê krá tơniăn. Mô đô̆i hneăng hdrối nah A Tôn, pơlê Pu Tah, cheăm Măng Ri, tơring Tu Mrông ai kơdrum sâm Ngọc Linh kơnâ hên rơtal liăn, tối ăm ‘nâi:

“Rơpŏng á pêt pơkeăng kong sâm Ngọc Linh lối 10 hơnăm kố. Cho khu mô đô̆i hneăng hdrối nah dêi thôn a pơtâng tối, mơhnhôk kuăn pơlê ‘na mơnhông cheăng kâ vâ kuăn ‘nĕng hriâm troh tá tui lui. Má péa nếo cho pơtâng tối, mơhnhôk kuăn pơlê ‘na khoa hok kih thuât, ‘na pêt loăng pơkeăng tung mê ai loăng pơkeăng sâm Ngọc Linh pêi lo liăn cho hên’’.

Khu mô đô̆i hneăng hdrối nah kong pơlê Kon Tum ai vâ chê 19.000 ngế hôp a 111 tíu a 10 tơring, pơlê kong kơdrâm tung kong pơlê. Kơnôm pêi pro lĕm tro tơdroăng ‘’Mô đô̆i hneăng hdrối nah kum dêi pó kơdroh kơtiê, pêi cheăng kâ rơkê’’, 5 hơnăm hiăng hluâ kơxô̆ rơpŏng kơtiê tung khu kơdroh châ sap ing lối 16% chu u ối pá kơdâm 8%. Mâu khu râ tung kong pơlê xuân gum khu pú xut tah châ 500 toăng hngêi pơtân ƀă pro nếo 44 hngêi tuăn pâ diâp khu pú mô đô̆i hneăng hdrối nah.

Đăi tă Võ Thanh Chính - Kăn hnê ngăn Khu mô đô̆i hneăng hdrối nah kong pơlê Kon Tum, kăn pơkuâ Khu xiâm pơkuâ cheăng lêng kong pơlê, tối nhuô̆m pâ tơbâ troh Pôa Hồ Chí Minh, Kăn xiâm hnê ngăn tơnêi têa hneăng apoăng, ngế mơjiâng, pơtâp ƀă cho ngế pâ nhuô̆m pâ dêi khu lêng; tơbâ troh Đăi tươ̆ng Võ Nguyên Giáp, Kăn pơkuâ khu lêng kuăn pơlê Việt Nam. Đăi tă Võ Thanh Chính tối ăm ‘nâi, mơhé hiăng pơtê cheăng laga mâu kăn ƀô̆ râ xiâm khu lêng đi đo rak hiâm mơno lĕm Mô đô̆i Pôa Hồ.

“Mơhé hiăng ôh tá pro lêng laga hiâm mơno Mô đô̆i Pôa Hồ xuân séa bâ eăng cho tíu ki mơhno troăng ăm rêm tơdroăng pêi pro. Ngin kô veăng pleăng ivá, tuăn ngôa rơkê tung tơdroăng mơjiâng ƀă gâk kring Tơnêi têa. Hnê hriâm rơxông ối nếo hiâm mơno pâ nhuô̆m tơnêi têa, chuh ngiah ngế khên tơnôu kăch măng’’.

Mơnhông hiâm mơno, khôi túa vâi krâ nah ‘’Mô đô̆i Pôa Hồ’’, mâu rơxông mô đô̆i hneăng hdrối nah dêi kong pơlê Kon Tum đi đo hlê plĕng tŭm ƀă ngăn hnoăng cheăng mơjiâng, gâk kring Đảng, khu râ kăn pơkuâ, gâk kring Kuăn pơlê, rak krá tơniăn kal kí, tơniăn pơlê pơla a pơlê pơla cho hnoăng cheăng kal kí ki kal má môi. Ƀă hnoăng cheăng pêi pro Pơkâ 04 dêi Tĭnh ủy Kon Tum ‘na ‘’Pơtối mơnhông cheăm ki pá puât tung rơxông nếo”, ƀă troăng pêi “khu pú hên kơdĭng, ngế krê kơdĭng”, mô đô̆i hneăng hdrối nah hiăng gum 2 rơpŏng ki pá puât a thôn Ktu, cheăm Hơ Moong, tơring Sa Thầy hlŭn ing kơtiê krá tơniăn. Nôkố troăng pêi pơtối châ mơnhông ƀă pêi pro a thôn Kon Hia 1, cheăm Đăk Rơ Ông, tơring Tu Mrông tiô hiâm mơno Pơkâ pêi dêi Khu pơkuâ hnê ngăn cheăng Đảng kong pơlê Kon Tum.

Kô chiâng mơnhên, tơdroăng Mô đô̆i hneăng hdrối nah gum dêi pó kơdroh kơtiê, pêi cheăng kâ đi đo châ mâu khu râ Khu a kong pơlê Kon Tum tơkŭm pêi pro châ tơƀrê, ai ivá troh lâp lu tung hên kơvâ cheăng. Ing mê, kum mơdêk tơdroăng rêh ối ƀă mơjiâng ivá mơhnhôk, hnê thế khu pú veăng vâ tơ’noăng pêi cheăng, mơjiâng tơmeăm, mơnhông hiâm mơno ki mơ-eăm xêh, rơdêi xêh, pơhlêh troăng tơmiât, troăng pêi.

Ki nhên, mâu troăng pêi xua Khu mô đô̆i hneăng hdrối nah pêi pro hiăng gum tung tơdroăng pơhlêh pêt tơmeăm khoăng, mơnăn păn, xúa tơmeăm, ki rơdêi ‘na tơnêi tơníu, pêi cheăng, kơxô̆ liăn vâ mơ’no pêt mơjiâng tơmeăm. Khu mô đô̆i hneăng hdrối nah hiăng khên tơnôu xúa ki rơkê kih thuât, kŏng ngê̆, tung pêt mơjiâng tơmeăm, uâ mơdiê, rak ƀă tê tơmeăm... Troh nôkố, a kong pơlê Kon Tum ai 1 Kâu lăk ƀô̆ ‘’Mô đô̆i hneăng hdrối nah, mô đô̆i pêt mơjiâng tơmeăm, tê mơdró’’, 720 troăng pêi kơdroăng păn, 11 hngêi păn mơnăn, 11 khu tơrŭm cheăng, 6 tôh tơrŭm cheăng, 12 khu tê mơdró xua khu mô đô̆i hneăng hdrối nah pơkuâ, tăng cheăng pêi ăm dâng 3 rơpâu 500 ngế ai pêi lo liăn tơniăn.