Drô troăng kân tơdrăng lĕm, mâu kŏng nhân kih sư dế pêi cheăng ôh tá pơtê: Tung mê ok ƀê tông, mơjiâng pro kông troăng ăm klêi tơrêm tíu ki pơcháu ki kŭn. Idrâp kơmăi kơmok chuât rơdêng. Mâu rơxế kân pơtối dêi rơpó chơ mâu tơmeăm ki mơjiâng pro. Ngoh Lê Văn Huynh, kŏng nhân dế pêi cheăng a tíu tơdjêp troăng prôk TL10 tối:

“Nhŏng o kŏng nhân mơ-eăm pêi cheăng tâi ivá tơná. Xuân kơhnâ pêi, mơhé Têt la mâu nhŏng o xuân kơhnâ pêi cheăng. Ƀă tơdroăng tâi tâng mâu nhŏng o xuân thế mơ-eăm pêi kơhnâ, ƀă tơdroăng pơkâ vâ tơniăn tơdroăng mơjiâng pro”.

Tơdrêng amê, ngoh Phan Viết Trí, đô̆i trương đô̆i ki dế pêi cheăng pro troăng a tíu tơdjêp TL10 ăm ‘nâi, đô̆i dêi ngoh ai 30 ngế, hâi Têt yương lĭt, tâi tâng đô̆i kố xuân pêi cheăng tiah hmâ.

“Nôkố mâu nhŏng o dế mơ-eăm pêi cheăng tâi ivá vâ mơdoh chôu pro troăng ăm klêi tro tiô pơkâ. Mơhé kong prâi ôh tá tơniăn la mâu nhŏng o xuân mơdoh chôu vâ pêi cheăng, kong mêi xiân pêi. Têt yương lĭt nhŏng o xuân pêi môi tiah hmâ’’.

Troăng pá kơdâm ngo văng Phượng Hoàng cho troăng mot ki má môi troăng kân tơdrăng lĕm Ƀuôn Ma Thuột. Nôkố khu mơjiâng pro dế hbrâ mơngế, rơxế tơmeăm, kơmăi kơmok tơbleăng pro ta kơhâi ta kong măng’’ pêi plâ hâi măng vâ pê klêi troăng pá kơdâm ngo a mơ’nui hơnăm 2025. A drô troăng pá kơdâm văng Phượng Hoàng péa kong pơlê Dak Lak, chât  ngế kŏng nhân rơtế ƀă mâu rơxế, tơmeăm kơmăi komok dế pro pơtôu min, vâ hneăng hmốu, tŏng xo djâ tíu ê tơnêi hmốu lo pa gong,  kêp meăm a hlâm, meăm thĕp, tôh ƀê tong ƀă hmốu a kơpêng klôh.

Pôa Cao Tấn Lực - Phŏ pơkuâ ngăn tíu dế chiâ pro klôh pá kơdâm  văng Phượng Hoàng , ăm ‘nâi;

“Kŏng ti  chêh tơdroăng pơkâ pêi ta kơhâi ta kơmăng pơtối pêi plâ hâi măng vâ axoăng mơngế pêi rêm chôu ôh tá pơtê tơdroăng cheăng chiâ khuăng tơnêi pá kơdâm ngo. Tơdroăng chiâng tơnêi dêi ngin tung klôh dêi peăng pơlôu peăng mâ hâi Lu ‘na hơ-ếo peăng kong pơlê Dak Lak hiăng chiâng châ 400 met, peăng hơ vá mê hiăng châ lối 440 met”.

Pôa Ngô Hiểu Khoa, Ngế pơkuâ ngăn Grup Đèo Cả ăm ‘nâi, troăng ki chiâ pá kơdâm văng Phượng Hoàng xŏn 1,7km, cho môi tung mâu troăng klôh mơjiâng pro ki xŏn tâi tâng 11km xua tíu pêi cheăng xo chiâ pro. Nôkố rêm hâi grup kố axoăng 400 ngế pêi ƀă dâng 100 toăng rơxế ai tá kơmăi kơmok rơtế lo pêi hnê chiâ pro troăng pá kơdâm ngo rơtế ƀă 10 to kơmăi tŏng tơnêi ƀă troăng mê cho dêi tíu mê mơjiâng pro. Tâng tơdroăng xĕn tơnêi hngêi trăng peăng kong pơlê Khánh Hòa châ pêi cheăng rơhéa, tơdroăng pơkâ hdró  pro troăng pá kơdâm ngo kô pê klêi  a mơ’nui  hơnăm 2025. Pôa Ngô Hiểu Khoa, tối tiah kố:

“Hơnăm 2025, ngin mơ-eăm pê klêi tơdroăng cheăng mơjiâng pro mâu trăng, châ, tíu ki vâ pơtóu ƀă mâu tíu ki a ‘ngêi tung kơdâm kông. Krê  ‘na troăng ki pong pá kơdâm văng Phượng Hoàng dế trâm iâ tơdroăng pá ‘na tơdroăng gu xĕn tơbăng tơnêi a ngâ bo klôh peăng mâ Hâi Lo kong pơlê Kháng Hòa ƀă tâng tơniăn lôu péa klôh hdrối Têt yương lĭt hơnăm 2025 kố ƀă tơdroăng ‘na tơnêi tíu môi tiah akố mê mơni troh mơnui hơnăm 2025 ngin kô rak tơniăn tiô tơdroăng pơkâ chiâ pro klôh Phượng Hoàng’’.

Tơdroăng tơkêa bro troăng kân tơdrăng lĕm Khánh Hòa - Ƀuôn Ma Thuột tâi tâng ki xŏn 116,5 km, tung mê, ki hên tơdroăng tơkêa bro tơkâ luâ kong pơlê Dak Lak. Malối, tơdroăng tơkêa bro 3 hiăng pro klêi hnoăng cheăng ‘mâi  xĕn chêl thiê̆n hngêi trăng gu tơbăng tơnêi  ƀă  ai tiô tơdroăng mơjiâng pro vâ chê 32%. Mơhé trâm hên xơpá ‘na kong prâi, ƀă 18 hâi kong mêi tung khế 12, la kơnôm ing tơdroăng mơ-eăm pơtối rak vế. Pôa Đặng Thọ Dần, Ngế pơkuâ tơdroăng tơkêa bro ăm ‘nâi:  

“Nôkố tung kơxô̆ tơdroăng cheăng pêi ai va achê 1 rơpâu ngế dế pêi cheăng, kong mêi xuân pêi, 500 tơmeăm ƀă 49 tíu pêi cheăng tung tâi tâng troăng. Ngin đi đo tối pơchân mâu tíu pêi cheăng thế rak tơniăn tro luât pêi cheăng, kŏng nhân ki pêi cheăng châ kâ liăn khế, thế tơniăn kring vế hnoăng ki pơxúa dêi mơngế pêi cheăng’’.

Ƀă tơdroăng pơkâ a mơ’nui hơnăm 2025 pê klêi 68 km rôh apoăng dêi tơdroăng Tơkêa bro troăng kân Khánh Hòa - Ƀuôn Ma Thuột, mâu tíu pêi cheăng ki tơdjâk troh hiăng ƀă dế pêi tơdrêng mâu troăng hơlâ vâ mơdêk pêi rĕng klêi. Mâu hâi apoăng hơnăm nếo 2025, rơpâu ngế kŏng nhân ki pêi cheăng a tíu pêi cheăng. Vâi cho mâu ngế ki mơ-eăm pêi kơhnâ vâ rĕng klêi troăng kân tơdrăng lĕm, veăng ‘no hnoăng vâ Tây Nguyên tối tơdjuôm, Dak Lak tối krê ai tơ’nôm ivá mơnhông dêi kong pơlê xông tơƀrê.