Tơpui hnê mơhno a rôh hôp, pôa Tô Lâm, Kăn xiâm pơkuâ hnê ngăn Đảng khĕn kơdeăn mâu tơdroăng ki pêi pro chía tơƀrê tŭm têk dêi tâi tâng kơvâ cheăng tơrŭm mơjiâng Đảng, ing tơdroăng ki kơhnâ tí tăng ‘nâi plĕng pêi pro klêi troăng hơlâ tơdroăng cheăng mơjiâng ƀă ‘mâi rơnêu Đảng, lơ tơdroăng cheăng kăn ƀô̆ malối cho kăn ƀô̆ râ la ngiâ ai tŭm túa lĕm, ivá cheăng, tơdroăng ki châ vâi loi, tơxâng ƀă hnoăng cheăng.

Kăn xiâm pơkuâ hnê ngăn Đảng pơkâ thế, tâi tâng kơvâ cheăng tơrŭm mơjiâng Đảng pơtối tơkŭm tí tăng ‘nâi plĕng, pơkâ mơ’no kơ koan cheăng kal kí tơkŭm, iâ pêi cheăng xêt tơƀrê tung mê hnoăng cheăng dêi ngế ki ối a ko cho hnoăng cheăng châ pơcháu, khŏm pêi klêi, tơmiât troh tơdroăng pơkâ thế kân má môi cho pro tơ’lêi hlâu má môi ăm khu mơdró kâ ƀă kuăn pơlê.

Pôa Tô Lâm, Kăn xiâm pơkuâ hnê ngăn Đảng xuân pơkâ thế, rĕng séa ngăn mâu tơdroăng pơkâ dêi Đảng, ‘mâi rơnêu ‘mot tơ’nôm mâu tơdroăng pơkâ néo ‘na kơvâ cheăng, tơrŭm kơ koan cheăng, tơdjâk tơdroăng cheăng, túa pơkâ pêi cheăng dêi râ Đảng mâu kơ koan, tíu pêi cheăng rak vế môi tuăn, tơdâng tơ’mô ing Tơnêi têa troh kong pơlê.