Tung 5 hâi, Kăn xiâm pơkuâ hnê ngăn Đảng hiăng ai lối 40 tơdroăng cheăng hlối hôp, trâm mâ, tơpui ƀă mâu kăn, tơbleăng luât tŏng gum, trâm mâ kuăn pơlê  mơngế Việt Nam a péa kong têa, hlối pôu ngăn mâu tíu pêi cheăng, túa lĕm tro. 

Rôh kố, mâu khu xiâm, kơvâ cheăng, kong pơlê, khu mơdró Việt Nam ƀă péa tơnêi têa hiăng kĭ tơhrâ tơrŭm cheăng tung hên kơvâ, tung mê ai hnê hriâm ƀă hnê mơjiâng tuăn ngôa rơkê, hbrâ mơdât mâu ki ai xôi tơkâ luâ kong têa, ’na ká xi xŏng, cheăng kâ kơxô̆, pơ’lêh kơxô̆, pơ’lêh hên tung cheăng kâ, liăn ngân. Hdrối mê, a kơhâi dé lơ 13/3, pôa Tô Lâm, Kăn xiâm pơkuâ hnê ngăn Đảng veăng hôp ƀă tối tơbleăng a rôh hôp ƀă khu mơdró Việt Nam-Singapore ƀă pơxá “Việt Nam-Tíu troh dêi chal nếo cheăng khoa hok kơmăi kơmok hlối tơrŭm cheăng ‘na liăn ngân”, ƀă veăng ai vâ chê 100 khu mơdró 2 tơnêi têa.

Kăn xiâm pơkuâ hnê ngăn Đảng ăm ‘nâi, tung la ngiâ Việt Nam pơtối tơ’mot mâu tơdroăng tơkêa bro FDI dêi mâu kơvâ cheăng môi tiah khoa hok, pơ’lêh hriăn plĕng ki nếo tăng ‘nâi plĕng ƀă mơnhông tơƀrê, cheăng kâ tơtêk, cheăng kâ kơxô̆, pơ’lêh kơxô̆, on tơhrik krúa.