Tu ko koh nhoăm pâ a tơnâp mâu lêng hlâ xua tơplâ khên tơnôu, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa ƀă khu kăn hiăng mơhno hiâm mơno mơnê khât ƀă hnoăng veăng ‘no kân kĭn ƀă hnoăng cheăng ki kân dêi mâu lêng khên tơnôu, mâu ngế hlâ ai hnoăng hiăng pleăng plâ rơxông ối nếo, tơplâ khên tơnôu ta troh hlâ vâ rak tơniăn lĕm ăm tơnêi têa.

Nhoăm pâ chôu nhang tơbâ troh pôa Lê Duẩn, Kăn xiâm pơkuâ hnê ngăn Đảng hneăng hdrối a Kơpong tơbâ a thôn Hậu Kiên, cheăm Triệu Thành, tơring Triệu Phong, pôa Tô Lâm, Kăn xiâm pơkuâ hnê ngăn Đảng Kăn xiâm hnê ngăn tơnêi têa ƀă khu kăn hiăng mơhno hiâm mơno mơnê khât hnoăng kân dêi pôa Lê Duẩn, Kăn xiâm pơkuâ hnê ngăn Đảng ƀă tơdroăng tơplâ pro tơleăng lĕm hdroâng mơngế, lâp tơnêi têa tơrŭm môi.

Chêh ‘măn tung hlá mơ-éa, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối nhên: “Plâ rơxông ƀă tơdroăng cheăng dêi pôa Lê Duẩn hiăng veăng ‘no ăm tơdroăng pro tơleăng lĕm hdroâng mơngế ƀă mơjiâng chuh ngiah xah hô̆i, mơnhông tơnêi têa Việt Nam. Mâu hnoăng veăng ‘no, hnoăng pleăng ki kân dêi pôa Lê Duẩn hiăng pro  pơ-eăng inâi Tơnêi têa Việt Nam ƀă đi đo ta ah tung rơxông tơplâ khên tơnôu dêi hdroâng mơngế”.