Pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa hiăng tối vâ môi tuăn hlo mơnhông tơniăn lĕm pơla péa tơnêi têa; tối Việt Nam môi troăng ngăn nhoăm tơdroăng tơrŭm cheăng, tơrŭm krá pơla péa Đảng, péa tơnêi têa ƀă kuăn pơlê péa tơnêi têa.

Pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa  mơnê rơkong krếo lăm pôu dêi râ kăn xiâm troh kong têa Cuba dêi Kăn xiâm pơkuâ hnê ngăn Đảng ki má môi, dêi pôa Miguel Diaz-Canel, Kăn xiâm hnê ngăn tơnêi têa, tối púi vâ hneăng lăm pôu kô ‘mâi mơnhông loi nhoăm, tơrŭm krá tâ nếo ki môi tuăn dêi rơpó pơla péa hdroâng mơngế, mơdêk tơrŭm tơƀrê, mơnhông djâ Việt Nam - Cuba rế xông tơƀrê, mơnhông krá tơniăn.

Kăn teăng mâ Orlando Nicolas Hernandez Guillen tơpui rơrêk châ trâm pôa Tô Lâm, Kăn xiâm hnê ngăn tơnêi têa hdrối vâ lăm pôu ki  ton nah pơla péa pâ; mơhno Đảng, Tơnêi têa ƀă kuăn pơlê Cuba đi đo séa ngăn khĕn kơdeăn hnoăng vâ chê dêi 40 hơnăm pơ’lêh nếo ing hnoăng pơkuâ dêi Đảng Kŏng sản Việt Nam ki má môi cho pôa Tô Lâm, Kăn xiâm pơkuâ hnê ngăn Đảng, kăn xiâm hnê ngăn tơnêi têa.