Klêi kơ’nâi mơgêi mâu tơdroăng pêi cheăng tung roh lăm pôu pêi cheăng râ Tơnêi têa troh Mông Cổ, hâi lơ 1/10, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa rơtế ƀă Khu râ kăn teăng mâ râ xiâm Việt Nam lo ing pơlê kong xiâm Ulan Bator, lăm pôu pêi cheăng râ Tơnêi têa troh a Ireland tiô rơkong krếo thế dêi Kăn xiâm pơkuâ kong têa Ireland. Kố cho roh lăm pôu râ tơnêi têa apoăng troh kong têa Ireland dêi Kăn xiâm hnê ngăn tơnêi têa Việt Nam sap ing péa tơnêi têa mơjiâng tơrŭm cheăng tơpui kâ, ing mê veăng kum mơdêk tơdroăng ki loi ‘na kal kí ƀă thăm mơdêk tơrŭm nhŏng o Việt Nam – Ireland.

Roh lăm pôu pêi cheăng dêi pôa Tô Lâm troh a kong têa Ireland mơnhên Việt Nam đi đo nhuô̆m tơrŭm cheăng ƀă Ireland, kum mơdêk tơdroăng ki loi tơngah kal kí, pro trâu hơngế tâ nếo tơrŭm hên pâ pơla péa tơnêi têa tung la ngiâ, ki rơhêng vâ tối tung kơvâ cheăng kâ, tê mơdró, mơ’no liăn cheăng, khoa hok kŏng ngê̆, pơhlêh nếo tơmiât pêi rơkê, hnê hriâm, hnê mơjiâng tuăn ngôa rơkê, pêi chiâk deăng; xua pơkâ mơnhông krá tơniăn, xua hơniâp lĕm, tơrŭm ƀă mơnhông a kơpong ƀă lâp plâi tơnêi.