Tung pơla lăm pôu păng ‘nâng kong têa Kŏng hoa Pơhlăng, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa hiăng veăng Leh tơdah păng ‘nâng; trâm mâ khu chêh hlá tơbeăng, trâm mâ tơpui tơno ƀă pôa Emmanuel Macron, Kăn xiâm pơkuâ kong têa Pơhlăng; trâm mâ Kăn xiâm hnê ngăn Kuô̆k hô̆i râ má môi Pơhlăng; tơdah Kăn pơkuâ hnê ngăn lâp tơnêi têa Đảng Kŏng san Pơhlăng, Khu tơrŭm nhŏng o Pơhlăng - Việt Nam; lăm pôu Tíu pêi cheăng ƀă pêi cheăng ƀă Kăn pơkuâ UNESCO.

Pơhlăng ƀă Việt Nam tối rơdêi hnoăng cheăng ki kal dêi chuh ngiah hên troăng, tung mê Khu lâp kong rak tíu ối tung dế, tơdrêng amê vêh mơnhên tơkêa pêi tiô Luât Khu lâp kong têa, ki rơhêng vâ tối cho ki kal dêi tơdroăng mơdêk ƀă gâk kring hnoăng kuăn mơngế ƀă mâu hnoăng tơniăn krê ki xiâm ƀă tơdroăng mơnhông dêi rêm tơnêi têa.

Péa pâ tơkêa thăm hnê mơhno ƀă tơrŭm a mâu hneăng hôp tơpui tơno kơpong, ki rơhêng vâ tối cho ASEAN, ƀă lâp plâi tơnêi, tung mê ai Khu tơrŭm lâp plâi tơnêi tơpui nâl Pơhlăng.