Kơxo lơ 5/10, A Hà Nội, pơxiâm po kân krip Roh hôp má pŭn Khu pơkuâ ngăn Đảng tơnêi têa rôh má XIV. Tơpui pơxiâm po Rôh hôp, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa pơkâ thế Tơnêi têa tơkŭm tơpui, veăng tối ‘na mâu tơdroăng ki kal, tơdroăng cheăng tung la ngiâ ƀă tơdroăng mơnhông dêi tơnêi têa tung hneăng ki nếo. Rôh hôp po tung pơla tơdroăng lâp plâi tơnêi pơtối pơhlêh hên, tơxup tơbriât tơdroăng cheăng tung la ngiâ, tơplâ tơplong, tơdroăng ôh tá tơniăn ‘na tê mơdró ƀă mâu tơdroăng pơhlêh rĕng ‘na khoa hok, kong ngê̆ pơkâ mơ’no hên tơdroăng pơkâ thế pơhlêh nếo ƀă Việt Nam.

Pôa Tô Lâm, Kăn xiâm pơkuâ hnê ngăn cheăng Đảng, Kăn xiâm hnê ngăn tơnêi têa pơkâ thế Tơnêi têa tơkŭm tung 4 tơdroăng ki kân, mê cho pơtối mơdêk ivá pơkuâ, tơdroăng pơkuâ ƀă ivá tơplâ dêi Đảng; pơhlêh nếo túa pơkuâ, mơdêk ki tơƀrê xêt khât, tơƀrê tung tơdroăng cheăng kal kí; mơjiâng khu kăn ƀô̆, mơnhông ƀă xúa mâu ngế cheăng ăm mơnhông rĕng, krá tơniăn. Kăn xiâm pơkuâ hnê ngăn cheăng Đảng, Kăn xiâm hnê ngăn Tơnêi têa pơkâ thế mâu tơdroăng pơkâ pêi athế tro ƀă ki ai khât, lêi tah mâu tíu tro kreăng, mơnhên nhên hnoăng ƀă tơkŭm pêi pro kơtăng, tơƀrê, pêi châ tiô pơkâ thế mơnhông tơnêi têa tung chal nếo.