Mâu hơnăm hdrối nah, ing hnoăng pơkuâ dêi Đảng, tơmâng rak ngăn khât dêi Tơnêi têa ƀă veăng ‘no hnoăng dêi tâi tâng pơlê pơla, tơdroăng kring tơniăn hiăng pêi châ tơƀrê hên ki kal, troh nôkố lâp tơnêi têa ai lối 99 rơtuh ngế veăng rôe ƀaoh hiêm khăm pơlât; dâng 2 rơtuh 500 rơpâu ngế châ kâ liăn pơtê cheăng xua hơnăm hiăng krâ, po rơdâ kring vế mâu ngế hơnăm hiăng krâ ôh tá ai liăn khế. Luât tŏng gum xăm kơtiê, ăm mung liăn, pro hngêi ối, hnê hriâm, khăm pơlât, tăng cheăng pêi ƀă tŏng gum mâu ngế xía vâ xua kong prâi pro ôh tá tơniăn hiăng chiâng tíu tơngah dêi rơtuh rơpŏng hngêi.

Pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối tiah kố, tơdroăng rêh ối tơniăn pơlê pơla hiăng pêi châ tơƀrê hôm ki kal. Laga, kong prâi ôh tá tơniăn, pơreăng tâ tú, pơ’lêh tơdroăng rêh ối pêi cheăng kâ pơ’lêh tíu tăng mơngế pêi cheăng xuân dế hlo ai tơdroăng pá tơvâ tơvân ki nếo. Vâ kuăn pơlê châ kring vế tâng ai tơdroăng xía vâ, Tơnêi têa thế ai luât pơkâ tro, khu pơkuâ thế ai ivá rơkê tối ăm ‘nâi hdrối, hbrâ ví ƀă kơjo kum teăm tơdrêng.

Kăn xiâm pơkuâ hnê ngăn Đảng, Kăn xiâm hnê ngăn tơnêi têa pơkâ thế mơjiâng khu xiâm ăm ‘nâi ‘na kơxô̆ dêi tơnêi têa ‘na kring tơniăn pơlê pơla, tơbleăng rêm hơnăm tiô kong pơlê ƀă khu kuăn pơlê. Ki xiâm troh hơnăm 2030 cho pơxiâm mơjiâng tơdroăng rêh ối pơlê pơlá hên râ, tŭm tơdroăng, chêh ‘măn tung kơmăi, tơniăn ‘na rêh ối ăm kuăn pơlê.

Kăn xiâm pơkuâ hnê ngăn Đảng, Kăn xiâm hnê ngăn tơnêi têa pơkâ thế Chin phuh, Kuô̆k hô̆i, Măt trâ̆n Tơnêi têa Việt Nam, râ ủi, mâu kăn kong pơlê ƀă tâi tâng pơlê pơla rơtế veăng pêi pro, kơdo mơ-eăm vâ rêm ngế kuăn pơlê Việt Nam, mơhé ối ulâi ƀă tung pơla niân lơ pá puât, xuân châ ai tơdroăng kring vế tơdroăng ki ôh tá mơhúa, châ achê, châ xúa, châ dâi tơemăm ki kal vâ xúa ƀă ai rôh vâ mơnhông tơƀrê.