Mơgêi roh hôp, Kăn xiâm pơkuâ hnê ngăn Đảng, Kăn xiâm hnê ngăn tơnêi têa khĕn kơdeăn hnoăng cheăng pêi dêi mâu kơ koan tung tơdroăng hbrâ mâu hlá mơ-éa chêh, hlá mơ-éa tơbleăng, hlá mơ-éa chêh pơkâ; hlối pâ thế pơtối tơmâng tơdroăng veăng hnê tối, pro klêi hlá mơ-éa tơniăn tŭm ƀă tro tiô pơkâ. Ƀă chuyên đề ‘na mâu troăng hơlâ mơnhông cheăng kâ tơnêi têa tiô Hlá mơ-éa chêh troăng hơlâ luât pơkâ 79 dêi Khu xiâm Kal kí, Kăn xiâm pơkuâ hnê ngăn Đảng, Kăn xiâm hnê ngăn tơnêi têa pơkâ thế môi tuăn hlê ‘na cheăng kâ tơnêi têa môi tiah ‘mâi hơ’lêh ‘na liăn ngân, tơmeăm khoăng tơnêi têa, tơnêi, tơmeăm khoăng, hngei trăng, troăng prôk, tơmeăm ‘măn kơdĭng dêi tơnêi têa, khu mơdró tơnêi têa ƀă mâu tơmeăm ki ê.

Ki kal tung la ngiâ tăng ngăn tâi tâng mâu tơdroăng ‘na luât ki tơdjâk troh, tah mâu tíu ki pá ‘na mơngế, mơdêk tơbrê pơxúa tung tơdroăng rak ngăn khu mơdró tơnêi têa ƀă pơtối pêi hnoăng cheăng hnê djâ dêi cheăng kâ tơnêi têa tung tơdroăng pêi cheăng kâ.